Buss Accident : उत्तर प्रदेशमध्ये भीषण बस अपघात; ट्रकच्या वेगाने बस कापून निघाली, सात जणांचा मृत्यू

Uttar Pradesh Bus Accident : उत्तर प्रदेशातल्या उन्नाव येथे रविवारी दुपारी भीषण बस अपघात झाला. ट्रक आणि बसच्या समोरासमोर झालेल्या अपघातात बस एका बाजूने कापून निघाली आहे. या दुर्घटनेत सात जणांचा मृत्यू झाला असून २५ पेक्षा जास्त लोक जखमी झाले आहेत. जखमींमध्ये अनेकांची प्रकृती नाजूक असल्याचं सांगितलं जात आहे.

बांगरमऊ येथून उन्नावकडे जात असलेली खासगी बस सफीपूर कोतवाली पोलिस ठाण्याच्या हद्दीतील जमल्दीपूर गावाजवळ पोहोचली असता बसला अपघात झाला. समोरून भरधाव वेगात येणाऱ्या ट्रकने बसला समोरासमोर जोरदार धडक दिली. धडकेनंतर बसला एका बाजूने ट्रकने कापत नेलं.

अपघातानंतर घटनास्थळी लोकांचा कर्कश आवाज घुमला होता. प्रवाशी मोठमोठ्याने किंचाळत होते. आजूबाजूचे लोक मदतीसाठी धावले. जखमी आणि मृत लोक बसच्या फाटलेल्या साईडने लटकत होते. घटनास्थळी पोहोचल्यानंतर पोलिसांनी जखमींना तातडीने रुग्णालयात हलवलं. काहींना डॉक्टरांनी मृत घोषित केलं.

घटनेनंतर ट्रक चालक चकलवंशी रस्त्याने पळून गेला. त्यानंतर पोलिसांनी जिल्ह्यामध्ये नाकाबंदी केली आहे. जखमींवर सफीपूर सीएचसी आणि जिल्हा रुग्णालयात उपचार सुरु आहेत. जखमी आणि मृतांबद्दल पोलिस माहिती घेत आहेत. घटना एवढी भीषण होती की धडक बसल्यानंतर बसमधील एक प्रवाशी रस्त्यावर येऊन पडला. त्यात त्याचं डोकं फुटलं. एवढंच नाही तर दोन प्रवाशांचं डोकं धडावेगळं झालं होतं.