'जिथं मत तिथं लस', केजरीवाल यांची नवी मोहिम

नवी दिल्ली - कोरोनाला रोखण्यासाठी दिल्लीमध्ये लसीकरणाचा वेग वाढवण्यात येत आहे. दरम्यान, आता लसीकरणाबाबत दिल्लीचे मुख्यमंत्री अरविंद केजरीवाल यांनी मोठी घोषणा केली आहे. आता मतदान कऱण्यात येणाऱ्या केंद्रावरच लसीकरणाची सुविधा देण्यात येणार आहे. अधिकारी घरोघरी जाऊन लोकांना लस घेण्यासाठी आवाहन करतील. दिल्लीचे मुख्यमंत्री अरविंद केजरीवाल यांनी सोमवारी सांगितलं की, जर केंद्राकडून लस वेळेवर मिळाली तर 45 वर्षांपेक्षा अधिक वयाच्या लोकांना एका महिन्यात लस देता येईल.

सध्या 45 वर्षांपेक्षा अधिक वयाचे लोक लसीकरण केंद्रावर कमी प्रमाणात येत आहेत. आता दिल्ली सरकार लोकांना घरोघरी जाऊन लसीकरणासाठी आवाहन करणार आहे. लोकांना मतदान केंद्रावरच लस देण्याची सुविधा असणार आहे. त्यामुळे लोकांना लस घेण्यात काहीच त्रास होणार नाही असं केजरीवाल यांनी सांगितलं.

नव्या मोहिमेनुसार सुरुवातीला 70 वॉर्डमध्ये हे लसीकरण सुरु करण्यात येणार आहे. दर आठवड्याला 70 वॉर्डमध्ये मोहिम चालवण्यात येईल. अशा प्रकारचे 4 आठवड्यात या मोहिमेची सुरुवात करण्याचा प्रयत्न असेल. बूथ लेव्हल ऑफिसर आता लोकांच्या घरी जातील. 45 वर्षांवरील लोकांना विचारण्यात येईल आणि त्यांना लस दिली जाईल. जर एखाद्याला लस देण्यात आली नसेल तर अधिकारी त्यांना स्लॉट देऊन येतील अशीही माहिती केजरीवाल यांनी दिली.

दिल्लीत 45 वर्षांवरील 57 लाख लोक आहेत. त्यापैकी 27 लाख लोकांना पहिला डोस देण्यात आला आहे. इतर 30 लाख लोकांना पुढच्या एक महिन्यात लस देण्याची योजना आहे. जे लोक लस घेण्यासाठी येणार आहेत त्यांना ई रिक्षा सुविधासुद्धा पुरवली जाणार आहे. पुढच्या दोन दिवसात पोलिंग बूथ अधिकारी त्यांच्या त्यांच्या बूथवरील घरांमध्ये जाऊन दोन दिवसांचे स्लॉट देऊन जातील. त्यानंतर सर्वांना लस देण्यात येईल. प्रत्येक आठवड्यात याप्रमाणेच लस देण्यात येईल. चार आठवड्यात सर्वांना लस मिळेल असंही सांगण्यात आलं आहे.