चीनमधून ६०० भारतीय विद्यार्थ्यांना मायदेशी आणणार

नवी दिल्ली - जीवघेण्या कोरोना विषाणूच्या उद्रेकाच्या पार्श्‍वभूमीवर चीनच्या हुएई प्रांतातील ६०० भारतीय विद्यार्थ्यांना मायदेशी आणण्यास आजपासून सुरुवात होऊ शकते. यासाठी दोन विशेष विमाने तयार ठेवण्यात आली असून चीनच्या सरकारकडून औपचारिक होकारानंतर या विद्यार्थ्यांना भारतात आणले जाईल. 

ताज्या बातम्यांसाठी डाऊनलोड करा ई-सकाळचे ऍप

हुवेई प्रांतात सुमारे १२०० भारतीय विद्यार्थी आहेत. कोरोना विषाणूच्या उपद्रवानंतर यातील आतापर्यंत ६०० हून अधिक जणांना चीनमधील भारतीय वकिलातीतर्फे मायदेशी येण्यासाठी संपर्क साधण्यात आला. त्यांच्यासाठी दोन विशेष विमानेही तयार ठेवण्यात आली असल्याचे परराष्ट्र मंत्रालयाचे प्रवक्ते रवीश कुमार यांनी साप्ताहिक वार्तालापादरम्यान सांगितले. 

दंगेखोरांवर कठोर कारवाई करू - अमित शहा

चीनमधील कोणत्याही भारतीय नागरिकाला कोरोना विषाणूचा संसर्ग झाला नसल्याची आतापर्यंतची माहिती आहे. १५ जानेवारीनंतर चीनमधून भारतात येणाऱ्या प्रत्येक प्रवाशाची वैद्यकीय चाचणी केली जाईल. त्यानंतरच प्रवेश दिला जाईल. अशा प्रवाशांना किमान १४ दिवस एकांतवासात निरीक्षणाखाली ठेवले जाईल. केंद्रीय मंत्रीमंडळ सचिवांनी आज याबाबत घेतलेल्या उच्चस्तरीय बैठकीत हा निर्णय झाला.