Crime News : गुरुद्वाराच्या परिसरात मद्यपान केल्याबद्दल महिलेची हत्या

पतियाळा : गुरुद्वाराच्या परिसरामध्ये मद्यप्राशन केल्याचा आरोप असलेल्या एका महिलेची गोळ्या घालून हत्या करण्यात आल्याची माहिती पोलिसांनी दिली. पोलिसांनी याप्रकरणी आरोपीला अटक केली असून तिच्या कृत्यामुळे आपल्या धार्मिक भावना दुखावल्या होत्या त्यामुळेच आपण हा निर्णय घेतल्याचे आरोपीने पोलिसांना सांगितले.

परविंदर कौर (वय ३०) असे या महिलेचे नाव असून दुख निवारण साहिब गुरुद्वाराजवळ असलेल्या पवित्र तलावाच्या शेजारी बसून त्या मद्यप्राशन करत होत्या असा दावा आरोपीकडून करण्यात आला आहे.

निर्मलजितसिंग सैनी या आरोपीने आपल्या परवाना असलेल्या पिस्तुलातून परविंदर कौर यांच्यावर गोळ्या झाडल्या. सैनी हा प्रॉपर्टी डिलर असून त्याच्याविरोधात याआधी कसल्याही प्रकारच्या गुन्ह्याची नोंद नाही. दुखनिवारण साहिब गुरुद्वाराच्या जलशयानजीक परविंदर कौर या मद्यप्राशन करताना आढळून आल्या होत्या.