CCTV Footage : जीम करताना कोसळला अन् क्षणात 24 वर्षीय पोलिसाचा हृदयविकाराने मृत्यू

हैदराबाद : हैदराबाद येथील जीममध्ये व्यायाम करताना एका २४ वर्षीय पोलिसाचा मृत्यू झाल्याची घटना घडली आहे. विशाल असं मृत्यू झालेला तरूणाचं नाव असून तो असिफ नगर पोलिस स्टेशन येथे कार्यरत होता. या घटनेचे सीसीटीव्ही फुटेज सोशल मीडियावर व्हायरल झाला आहे. गुरूवारी रात्री जीममध्ये त्याचा मृत्यू झाला. एक महिन्यातील तरूणाचा हृदयविकाराने झालेला हा दुसरा मृत्यू आहे.

अधिक माहितीनुसार, गुरूवारी रात्री विशाल जीममध्ये व्यायाम करत असताना त्याला अचानक छातीत दुखू लागले. त्यानंतर त्याने तिथे असलेल्या एका मशिनचा आधार घेतला आणि जमिनीवर बसला पण त्यानंतर तो कोसळला. तो खाली पडल्यानंतर तिथे उपस्थित असलेले तरूण त्याच्या मदतीसाठी धावले. काही तरूणांनी त्याला हॉस्पिटलमध्ये दाखल केले पण तोपर्यंत त्याचा मृत्यू झाला होता.

दरम्यान, कोरोना काळानंतर तरूणांमध्ये हृदयविकाराचे प्रमाण वाढले असून अनेक तरूणांचा मृत्यू झाल्याच्या घटना समोर आल्या आहेत. राष्ट्रीय जैवतंत्रज्ञान माहिती केंद्राने दिलेल्या माहितीनुसार, तरूणांच्या एकूण मृत्यूपैंकी २० टक्के मृत्यू हे हृदयविकारामुळे होतात.