Army MNS Admission : बारावीनंतर मुलींना लष्करात नोकरी करण्याची मिळणार संधी

पुणे - भारतीय सशस्त्र दलाच्या वैद्यकीय विभागात अधिकारी म्हणून काम करण्याची संधी आता मुलींना मिळणार आहे. सैन्यदलाच्या वतीने ‘मिलिटरी नर्सिंग सर्व्हिसेस’ (एमएनएस) अंतर्गत ऑनलाइन अर्ज प्रक्रिया सुरू केली आहे. याबाबतच्या सूचना सैन्यदलाच्या अधिकृत संकेतस्थळावर जाहीर करण्यात आल्या आहेत.

एमएनएस प्रवेश प्रक्रिये अंतर्गत मुलींना बारावीनंतर लष्करात नोकरी करण्याची संधी मिळणार आहे. यासाठी लेखी परीक्षा व मुलाखती अशा स्वरूपात उमेदवारांची निवड केली जाणार आहे. याकरिता १७ ते २५ वर्षे अशी उमेदवारांसाठी वयोमर्यादा ठेवण्यात आली आहे.

तसेच बारावी वैज्ञानिक शाखेतून उत्तीर्ण असणे गरजेचे आहे. ही प्रवेश बारावी तसेच ‘नीट’ची परीक्षा उत्तीर्ण झालेल्या मुलींना देता येणार आहे. निवड झालेल्या उमेदवारांना देशातील सहा लष्करी वैद्यकीय महाविद्यालयांमध्ये चार वर्षांचे बीएस्सी नर्सिंगचे प्रशिक्षण दिले जाणार आहे.

त्यामध्ये पुण्यातील सशस्त्र दल वैद्यकीय महाविद्यालयाचा (एएफएमसी) ही समावेश आहे. प्रशिक्षण पूर्ण झाल्यावर हे उमेदवार सशस्त्र दल वैद्यकीय सेवेच्या (एएफएमएस) नर्सिंग अधिकारी म्हणून सेवा बजावणार आहेत.

प्रवेश प्रक्रिये अंतर्गत एकूण २२० जागा राखीव ठेवण्यात आल्या आहेत. एमएनएस प्रवेशाबाबत अधिक माहिती तसेच अर्ज करण्यासाठी इच्छुक उमेदवारांना www.joinindianarmy.nic.in या सैन्यदलाच्या अधिकृत संकेतस्थळाचा वापर करता येईल.