CTET Exam : ‘सीटीईटी’ परीक्षा ७ जुलैला होणार; परीक्षेसाठी २ एप्रिलपर्यंत अर्ज भरता येणार

Pune News : केंद्रीय माध्यमिक शिक्षण मंडळातर्फे (सीबीएसई) केंद्रीय शिक्षक पात्रता परीक्षा म्हणजेच ‘सीटीईटी’ यंदा ७ जुलै रोजी होणार आहे. या परीक्षेसाठी उमेदवारांची अर्ज नोंदणीची प्रक्रिया सुरू झाली आहे.

उमेदवारांना २ एप्रिलपर्यंत अर्ज भरण्यासाठी अंतिम मुदत देण्यात आली आहे, असे ‘सीबीएसई’ने स्पष्ट केले आहे.‘सीबीएसई’ने यासंदर्भात प्रसिद्धीपत्रक काढून माहिती दिली आहे. गुणवत्तापूर्ण शिक्षणासाठी राष्ट्रीय शिक्षक शिक्षण परिषदेच्या (एनसीटीई) निर्णयानुसार पहिली ते आठवीच्या वर्गांना शिकवण्यासाठी टीईटी परीक्षा उत्तीर्ण होणे अनिवार्य आहे.

केंद्रीय स्तरावर सीबीएसईकडून सीटीईटी आयोजित केली जाते. त्यानुसार ७ जुलैला होणारी सीटीईटी ही १९ वी परीक्षा आहे. देशभरातील १३६ शहरांमध्ये ही परीक्षा होणार आहे.  उमेदवारांना परीक्षा देण्यासाठी २० भाषांचे पर्याय उपलब्ध आहेत.

पेपर एक सकाळी साडे नऊ ते बारा, तर पेपर दोन दुपारी साडेचार या वेळेत होणार आहे. परीक्षेचा अभ्यासक्रम, भाषा, पात्रता, परीक्षा शुल्क, परीक्षा घेण्यात येणाऱ्या शहरांची नावे, महत्त्वाच्या तारखा याचा संपूर्ण तपशील सीटीईटीच्या ‘https://ctet.nic.in/’ या संकेतस्थळावर उपलब्ध आहे. या संकेतस्थळावर उमेदवारांना परीक्षेसाठी ऑनलाइन अर्ज देखील करता येणार आहे.