रविवारच्या आत भरा अकरावी प्रवेशासाठी पसंती क्रमांक

पुणे, : अकरावी प्रवेशासाठी दुसरा टप्पा बुधवारपासून सुरू झाला असून, शाखा आणि महाविद्यालयांचा पसंती क्रमांक ठरविण्याची अंतिम मुदत रविवार (ता. २२) पर्यंत आहे. शहरात केंद्रीभूत अकरावी प्रवेश प्रक्रियेला गती आली आहे. शहरात आतापर्यंत ६२ हजार ७८१ विद्यार्थ्यांनी प्रवेशासाठी अर्ज केला असून, त्यातील ४५ हजार २६९ विद्यार्थ्यांनी अर्ज पडताळणी प्रक्रिया पूर्ण केली आहे. तर ४८ हजार ९३३ जणांनी अर्ज लॉक करण्याचा पर्याय निवडला आहे.

बुधवारी दाखल झालेल्या अर्जांपैकी २४ हजार ६०३ विद्यार्थ्यांनी शाखा आणि महाविद्यालयांचा पसंती क्रमांक नोंदविला आहे. शहरात ३०८ कनिष्ठ महाविद्यालयांतील एक लाख १० हजार ५५ जागांसाठी ही केंद्रीभूत प्रवेश प्रक्रिया पार पडत आहे. अकरावी प्रवेशासाठी विद्यार्थ्यांनी https://pune.11thadmission.org.in या संकेतस्थळाला भेट द्यावी.

‘आयसीएसई’च्‍या विद्यार्थ्यांसाठी सूचनापत्र :

आयसीएसई बोर्डाच्‍या विद्यार्थ्यांकरिता महत्त्वाचे सूचनापत्रक मंगळवारी जारी करण्यात आले. यानुसार ज्‍या विद्यार्थ्यांना बेस्‍ट फाइव्‍हचा लाभ घ्यायचा असेल, त्‍यांनी ग्रुप एक, ग्रुप दोनमधील सहा विषयांपैकी कोणतेही पाच विषयांचे बेस्‍ट फाइव्‍ह गुण ग्राह्य धरावे किंवा दुसऱ्या पर्यायानुसार ज्‍या विद्यार्थ्यांना ग्रुप तीनमधील गुण विचारात घेण्‍याची इच्‍छा आहे, अशा विद्यार्थ्यांच्या ग्रुप एक, ग्रुप दोन व ग्रुप तीनमधील सात विषयांची (सातशे गुण) सरासरी ग्राह्य धरली जाईल.