HPCL मध्ये पदवीधारकांना नोकरीची संधी; 'इतक्या' जागांवर होणार भरती

HPCL Recruitment 2022 : ऊर्जा क्षेत्रात सरकारी नोकरीच्या शोधात असलेल्या उमेदवारांसाठी एक आनंदाची बातमी आहे. हिंदुस्तान पेट्रोलियम कॉर्पोरेशननं (HPCL) विविध विभागांमध्ये (Hindustan Petroleum Corporation) मुख्य व्यवस्थापक, उपमहाव्यवस्थापक, सहाय्यक व्यवस्थापक आणि वरिष्ठ अधिकारी या 25 पदांसाठी उमेदवारांकडून अर्ज मागविण्यात आले आहेत. या पदांसाठी अर्ज करू इच्छिणारे उमेदवार 14 मार्चपासून HPCL च्या अधिकृत वेबसाइटवर hindustanpetroleum.com आपला अर्ज करू शकतात. दरम्यान, HPCL ने अर्ज करण्याची अंतिम तारीख 18 एप्रिल 2022 निश्चित केलीय.

पात्रता निकष

हिंदुस्थान पेट्रोलियममध्ये मुख्य व्यवस्थापक, उपमहाव्यवस्थापक या पदांकरिता अर्ज करण्यासाठी उमेदवारानं संबंधित व्यापारात एमई / एमटेक / पीएचडी केली असावी. तसेच, उमेदवारांना संबंधित क्षेत्रातील 12/15 वर्षांचा अनुभव असावा. या पदांसाठी वयोमर्यादा 45/50 वर्षे आहे.

तसेच असिस्टंट मॅनेजर पदांसाठी ME/MTech/PhD संबंधित ट्रेडमध्ये 3/5 वर्षांचा अनुभव असावा. या पदांसाठी कमाल वयोमर्यादा 33 ते 36 वर्षे आहे. तर, वरिष्ठ अधिकारी पदांसाठी उमेदवारांकडं ME/MTech/PhD असावी. तसेच वय 27/32 वर्षांपेक्षा जास्त नसावं. केंद्र सरकारच्या नियमांनुसार विविध राखीव प्रवर्गातील उमेदवारांना वयोमर्यादेत सवलत दिली जाईल, असं स्पष्ट केलंय.