HSC Exam: बारावीच्या परीक्षेसाठी गुरुवारपर्यंत अर्ज करता येणार

पुणे : महाराष्ट्र राज्य माध्यमिक व उच्च माध्यमिक शिक्षण मंडळामार्फत बारावीची परीक्षा येत्या शुक्रवारपासून (ता.४) सुरू होत आहे. या परीक्षेसाठी येत्या गुरुवारी (ता.३) सकाळी अकरा वाजेपर्यंत नियमित शुल्कासह अर्ज (आवेदनपत्र) ऑनलाइन पद्धतीने भरण्याची सुविधा उपलब्ध राहणार आहे. त्यानंतर अर्ज भरण्यासाठी संकेतस्थळ बंद करण्यात येणार आहे, अशी माहिती राज्य मंडळाने प्रकटनाद्वारे दिली आहे. (HSC Exam Updates)

राज्य शिक्षण मंडळामार्फत मार्च-एप्रिल २०२२ मध्ये बारावीची परीक्षा ४ मार्च ते ७ एप्रिल या कालावधीत आयोजित केली आहे. दहावी-बारावीच्या परीक्षेसाठी अर्ज भरणाऱ्या विद्यार्थ्यांना विलंब शुल्क आकारण्यात येऊ नये, विलंब शुल्क माफ करण्यात यावे. तसेच विद्यार्थ्यांना परीक्षेच्या आदल्यादिवशीपर्यंत ऑनलाइन अर्ज भरण्याची सुविधा उपलब्ध करून द्यावी, असे आदेश राज्य सरकारने डिसेंबरमध्ये दिले आहेत.

त्यानुसार विद्यार्थ्यांना परीक्षेच्या आदल्यादिवशीपर्यंत ऑनलाइन अर्ज भरण्याची सुविधा दिली आहे. दिलेल्या मुदतीनंतर मात्र परीक्षेसाठी ऑनलाइन अर्ज करण्याचे संकेतस्थळ बंद होईल, असे राज्य मंडळाचे सचिव डॉ. अशोक भोसले यांनी स्पष्ट केले आहे.