व्यावसायिक अभ्यासक्रमातील नियमबाह्य प्रवेश होणार अमान्य

पुणे - राज्य सामाईक प्रवेश परीक्षा कक्षामार्फत (सीईटी सेल) व्यावसायिक पदवी आणि पदव्युत्तर अभ्यासक्रमांच्या प्रवेश प्रक्रियेतील गुणवत्ता याद्या जाहीर होण्यापूर्वीच राज्यातील नामांकित खासगी महाविद्यालयांनी व्यवस्थापन कोट्यातील जागा भरण्यास सुरवात केल्याचे निदर्शनास आले आहे. या संदर्भात आलेल्या तक्रारींची तंत्रशिक्षण संचालनालयाने गांभीर्याने दखल घेतली असून नियमबाह्य प्रवेश अमान्य केले जातील असा इशाराही संचालनालयाने दिला आहे.

राज्यात सीईटी सेल अंतर्गत शैक्षणिक वर्ष २०२२-२३ करिता तंत्रशिक्षण विभागातील विविध पदवी व पदव्युत्तर पदवी व्यावसायिक अभ्यासक्रमांची प्रवेश प्रक्रिया सध्या सुरू आहे. महाराष्ट्र विनाअनुदानित खासगी व्यावसायिक शैक्षणिक संस्था (पूर्णवेळ व्यावसायिक पदवी पूर्व तांत्रिक पाठ्यक्रमांच्या प्रवेशांचे विनियमन) नियम २०१७ च्या पोट नियम १३ आणि सुधारित नियमांमध्ये दिल्यानुसार संस्थास्तरीय कोट्यातील जागा, अल्पसंख्याक कोट्यातील जागा आणि केंद्रीभूत प्रवेश प्रक्रियेनंतर रिक्त राहिलेल्या जागांवर प्रवेश विनाअनुदानित संस्थेतील संचालक किंवा प्राचार्य यांनी प्रवेश प्रक्रिया राबविण्यासाठी कार्यपद्धती निश्चित केली आहे. त्यानुसार प्रवेश प्रक्रियेतील तिसरी फेरी संपन्न झाल्यानंतर उर्वरित राहिलेल्या रिक्त जागा आणि संस्थास्तरावरील जागांच्या प्रवेश प्रक्रियेसंदर्भात दिलेल्या नियमांचे तंतोतंत पालन करून संस्थेने प्रवेश प्रक्रिया राबवावी, अशा स्पष्ट सूचना सीईटी सेलमार्फत देण्यात आल्या आहेत.

मात्र, तरीही  सीईटी सेलमार्फत गुणवत्ता याद्या जाहीर करण्यापूर्वीच नामांकित खासगी महाविद्यालयांनी व्यवस्थापन कोट्यातील जागा भरण्याची प्रक्रिया सुरू केल्याचे दिसून आले आहे. या पार्श्वभूमीवर तंत्रशिक्षण संचालनालयाने आक्रमक पवित्रा घेत नियमबाह्य प्रवेश मान्य केले जाणार नसल्याचे परिपत्रकाद्वारे स्पष्ट करत कडक पावले उचलली आहेत. व्यावसायिक अभ्यासक्रमांच्या प्रवेश प्रक्रियेत नियमबाह्य प्रवेश देऊन शैक्षणिक भ्रष्टाचार केला जात असल्याचा उल्लेखही तंत्रशिक्षण संचालनालयाने परिपत्रकात केला आहे.

राज्य सामाईक प्रवेश परीक्षा कक्षाकडे प्राप्त झालेल्या तक्रारीच्या अनुषंगाने तंत्रशिक्षण संचालनालयाच्या अखत्यारीतील असलेल्या काही संस्था नियमांचे उल्लंघन करून प्रवेश प्रक्रिया राबवीत असल्याचे दिसून येत आहे. प्रवेशाबाबत सक्षम प्राधिकारी हे राज्य सामाईक प्रवेश परीक्षा कक्षाचे आयुक्त आहेत. प्रवेशासंदर्भात त्यांच्याकडून वेळोवेळी देण्यात येणाऱ्या सूचनांचे काटेकोरपणे पालन न करता नियमबाह्य पद्धतीने केलेल्या प्रवेशांना प्रवेश नियामक प्राधिकरणाकडून मान्यता देण्यात येणार नाही, याची गांभीर्याने नोंद घ्यावी,’ असा इशारा राज्याचे तंत्रशिक्षण संचालक डॉ. अभय वाघ यांनी परिपत्रकाद्वारे दिला आहे.