Shivaji University : शिवाजी विद्यापीठाच्या परीक्षा तात्पुरत्या स्थगित; व्यवस्थापनाचा मोठा निर्णय

कोल्हापूर : कोल्हापूर (Kolhapur), सांगली आणि सातारा जिल्ह्यात गेल्या चार दिवसांपासून मुसळधार पाऊस सुरूय. कोयना, राधानगरी पाणलोट क्षेत्रासह आजारा, गगनबावडा परिसरात पावसानं थैमान घातलंय. परिणामी, राधानगरी धरणाच्या पाणी पातळीतही झपाट्यानं वाढ होऊ लागली असून धरण १०० टक्के भरलं असल्यानं धरणाचे स्वयंचलित दरवाजे आता उघडू लागले आहेत. आज पहाटे 5 वाजताच्या सुमारास गेट क्रमांक 6 उघडले असून यामधून मोठ्या प्रमाणात पाण्याचा विसर्ग पंचगंगा नदीमध्ये सुरूय.

यामुळं पंचगंगेच्या पाणी पातळीत वाढ होत असून नदीची वाटचाल धोका पातळीकडं होऊ लागली आहे. या पार्श्वभूमीवर प्रशासन अलर्ट झालं असून खबरदारी म्हणून नदीकाठच्या गावांना सतर्कतेचा इशारा देण्यात आला आहे. याच पार्श्वभूमीवर शिवाजी विद्यापीठांनं (Shivaji University) देखील मोठा निर्णय घेतलाय. कोल्हापूर, सांगली आणि सातारा (Sangli and Satara) या जिल्ह्यात अतिवृष्टीमुळं उद्भवलेल्या पूर परिस्थितीमुळं शिवाजी विद्यापीठाच्या दिनांक १० व ११ ऑगस्ट २०२२ रोजीच्या आयोजित करण्यात आलेल्या परीक्षा स्थगित करण्यात आल्या आहेत. या परीक्षांचं सुधारित वेळापत्रक स्वतंत्रपणे जाहीर करण्यात येईल, अशी माहिती परीक्षा व मूल्यमापन संचालकांनी दिलीय.