नितीशकुमार सरकारचा मंत्रिमंडळ वाटपाचा निर्णय, राजदला मिळू शकतात 'ही' महत्त्वाची खाती

Bihar Politics : नितीश कुमार (Nitish Kumar) आज पुन्हा बिहारच्या मुख्यमंत्रिपदाची शपथ घेणार आहेत. नितीश कुमार यांच्यासोबत तेजस्वी यादवही उपमुख्यमंत्रीपदाची शपथ घेणार आहेत. दरम्यान, महाआघाडी सरकारच्या नव्या स्वरूपाची जोरात चर्चा सुरूय. नव्या सरकारमध्ये विभागांची ब्लू प्रिंट काय असेल, हा प्रश्न आहे.

भाजपच्या कोट्यातील संपूर्ण खाती राजद (RJD) आणि काँग्रेसच्या खात्यात जाऊ शकतात, असा अंदाज व्यक्त केला जात आहे. जेडीयूकडं (JDU) पूर्वीप्रमाणंच डझनभर खात्यांची जबाबदारी असू शकते. यामध्ये जीतन राम मांझी (Jitan Ram Manjhi) यांच्या एका मंत्र्याचाही समावेश असेल.

विधानसभा अध्यक्षपद पुन्हा जेडीयूच्या खात्यात जाईल, असं मानलं जात आहे. सध्या विधानसभेचं उपसभापतीपद जेडीयूच्या महेश्वर हजारी यांच्याकडं आहे, त्यामुळं त्यांचा मंत्रिमंडळात समावेश केल्यानंतर काही दिवसांनी विधानसभेचं उपसभापती पद त्यांच्या कोट्यात जाण्याची शक्यता आहे. राजद आणि काँग्रेसच्या (Congress) आमदारांची संख्या एकत्र केली, तर राजदला 17 मंत्रीपदं मिळू शकतात, तर काँग्रेसला तीन पदांवर समाधान मानावं लागेल, अशी चर्चा राजकीय वर्तुळात आहे.

याआधीही बिहारमध्ये महाआघाडीचं सरकार असताना जवळपास त्याच सूत्रानुसार मंत्रिमंडळाची स्थापना झाली होती. मंगळवारी सर्वाधिक चर्चा सामान्य प्रशासन आणि पोलिस खात्याची झाली. आरजेडी गृहखातं मागत आहे, तर गृहखातं मुख्यमंत्री नितीशकुमार यांच्याकडं असल्याचं दिवसभरात समोर आलं. अशा स्थितीत यावर अंतिम करार कसा झाला याचा खुलासा झालेला नाहीय. दरम्यान, राजदला मोठमोठी कामाची खाती मिळू शकतात, असं राजकीय जाणकारांचं मत आहे.