MPSC PSI Result : कष्टाचं चीज झालं; गवंड्याच्या पोराची पोलिस उपनिरीक्षकपदाला गवसणी

सोलापूर : उत्तर सोलापूर तालुक्यातील गुळवंची येथील अत्यंत गरीब कुटुंबातील सुपुत्र ज्ञानेश्वर शिवाजी पलंगे याची महाराष्ट्र लोकसेवा आयोगामार्फत (MPSC PSI Result 2023) घेण्यात आलेल्या महाराष्ट्र दुय्यम सेवा अराजपत्रित गट ब मुख्य परीक्षा २०२० परीक्षेत पोलिस उपनिरीक्षकपदी निवड झाली.

ज्ञानेश्वर (Dnyaneshwar Palange) लहानपणापासूनच हुशार आणि कष्टाळू मुलगा होता. त्याचे प्राथमिक शिक्षण गुळवंची येथील जिल्हा परिषद प्राथमिक शाळेत झाले. माध्यमिक शिक्षण सोलापूर येथील श्री दिगंबर जैन गुरुकुल प्रशालेत झाले. बारावी वाणिज्य शाखेतून हरिभाई देवकरण प्रशालेत झाले.

पंढरपूर येथील द. ह. कवठेकरमध्ये डी. एड्. पूर्ण केले. त्याचवेळी त्याने अधिकारी होण्याचे स्वप्न डोळ्यासमोर ठेवले होते. पदवी शिक्षण पूर्ण झाल्यानंतर तो मुंबई पोलिस दलात भरती झाला. तेवढ्यावरच न थांबता त्याने अभ्यासात सातत्य ठेवत एमपीएससी तयारी सुरू ठेवली.

शिक्षण घेत असताना त्याचे वडील गवंडी काम करून तर आईने कपडे शिवून त्याच्या शिक्षणाला मदत केली. त्यांच्या कष्टाची जाण ठेऊन सातत्याने अभ्यास करून आज ज्ञानेश्वरने पोलिस उपनिरीक्षक पदाला गवसणी घातली आहे. त्याचे यश पाहून आई-वडिलांच्या डोळ्यांत आनंदाश्रू आले. गुळवंचीसारख्या छोट्याशा गावातील गरीब कुटुंबातील तरुण पोलिस उपनिरीक्षक झाल्याने सर्वत्र त्याचे कौतुक होत आहे.

आई-वडिलांनी माझ्यासाठी लहानपणी घेतलेल्या कष्टाची जाणीव ठेवून अधिकारी होण्याचे स्वप्न मी पाहिले होते. ते सत्यात उतरवण्यासाठी त्यांनी माझ्या पाठीवर हात ठेवून लागेल ती मदत केल्याने आज त्यांच्या कष्टाचे चीज झाले. मित्रमंडळींनी वेळोवेळी मार्गदर्शन केल्याने माझे स्वप्न साकार होण्यास मदत झाली. जिद्द, मेहनत आणि चिकाटी असेल तर अशक्य काहीच नाही.

- ज्ञानेश्वर पलंगे, नूतन पोलिस उपनिरीक्षक