Scholarship Exam: आता शिष्यवृत्ती परीक्षा होणार १२ ऑगस्टला

औरंगाबाद: Scholarship Exam: पाचवी आणि आठवीच्या विद्यार्थ्यांसाठी घेण्यात येणाऱ्या शिष्यवृत्ती परीक्षेच्या तारखेत पुन्हा बदल करण्यात आला आहे. शिक्षण विभागाने ९ ऑगस्टला परीक्षा घेण्याचे निश्‍चित केले होते, मात्र आता पुन्हा ही परीक्षा १२ ऑगस्टला घेण्यात येणार असल्याचे परीक्षा परीषदेकडून कळविण्यात आले आहे. दरवर्षी पूर्व उच्च प्राथमिक (पाचवी) आणि पूर्व माध्यमिक (आठवी) शिष्यवृत्ती परीक्षा फेब्रुवारीच्या दुसऱ्या किंवा तिसऱ्या रविवारी घेण्यात येते. परंतु, कोरोनामुळे या परीक्षेचे नियोजन पूर्णपणे कोलमडले आहे. आतापर्यंत या परीक्षेची तारीख सहा वेळा बदलण्यात आली आहे.

कोरोनामुळे सुरुवातीला ही परीक्षा फेब्रुवारीऐवजी २५ एप्रिलला घेण्याचे जाहीर करण्यात आले होते. त्यानंतर २३ मे, २१ जून अशातारखा बदलत गेल्या. ८ ऑगस्ट ही तारीख निश्‍चित करुन परीक्षा परीषदेकडून सर्व नियोजन करण्यात आले होते. मात्र, त्याच दिवशी सेंट्रल आर्म पोलीस फोर्स पदाची परीक्षा होती. तसेच या परीक्षेसाठी नेमकी शिष्यवृत्ती परीक्षेचीच केंद्रे अधिग्रहित करण्यात आली होती. त्यामुळे पुन्हा तारीख बदलून ९ ऑगस्ट करण्यात आली.

९ ऑगस्टला परीक्षा होणार असल्याने परीक्षा परीषदेकडून पुर्ण तयारी करण्यात आली होती. मात्र, ९ ऑगस्टला ‘जागतिक आदिवासी दिन’ असल्याने काही आदिवासी संघटनांकडून नाराजी व्यक्त करण्यात आली होती. त्यामुळे आता या परीक्षेच्या तारखेत पुन्हा बदल करण्यात आला आहे. आता शिष्यवृत्ती परीक्षेसाठी १२ ऑगस्ट ही तारीख निश्‍चित करण्यात आली असल्याचे महाराष्ट्र राज्य परीक्षा परीषदेचे उपायुक्त शैलजा दराडे यांनी पत्र जारी केले आहे. औरंगाबाद जिल्ह्यातून या परीक्षेसाठी एकूण २ हजार ५१६ विद्यार्थी प्रविष्ट झाले आहेत.