Corporation Election: गोखलेनगर-पंचवटी मधून तब्बल दोनशे सोळा हरकती

शिवाजीनगर : नुकत्याच जाहीर झालेल्या महापालिकेच्या निवडणुकीच्या अनुषंगाने प्रसिद्ध केलेल्या नकाशात प्रभाग क्रमांक पंधरा गोखलेनगर - पंचवटी या प्रभागाचे अनुसूचित जाती जमातीचे आरक्षण पडू नये म्हणून भौगोलिक दृष्ट्या सोयीस्कर असताना देखील गुंजाळवाडी या वस्तीचे विभाजन करून हा भाग प्रभाग क्रमांक सोळाला जोडण्यात आला. असे आरोप सर्वपक्षीय स्थानिक कार्यकर्त्यांनी करून शेकडो हरकती नोंदवण्यात आल्या आहेत. (Pune Corporation Election Updates)

हनुमान टेकडी ओलांडून अल्पसंख्यक गुंजाळवाडी या भागाचा काही भाग डोंगर ओलांडून दुसऱ्या प्रभागात टाकण्यात आला, तर चतुर्श्रुंगी डोंगराच्या पलीकडील भागातील चार याद्या प्रभाग पंधरा मध्ये जोडण्यात आल्या आहेत. हे सर्व राजकीय दबाव व हस्तक्षेपामुळे झाल्याचा आरोप कार्यकर्त्यांनी केला आहे.

आज पुणे महानगरपालिका सहाय्यक आयुक्त रवी खंदारे यांच्या घोले रोड क्षेत्रीय कार्यालयात प्रभाग पंधराच्या संदर्भात दोनशे सोळा हरकतीची नोंद झाल्याचे खंदारे यांनी सांगितले. सामाजिक कार्यकर्ते बाळा चव्हाण, सचिन इंगळे, राजश्री अडसूळ, राजेश नायडू, रमेश भंडारी,संजय तुरेकर, अजित इंगळे,रुपेश सोनवणे, भूषण भवर,राजेश काकडे, विशाल गायकवाड आदींसह अनेक नागरिकांनी हरकती नोंदण्यासाठी क्षेत्रीय कार्यालयात गर्दी केली होती.

शिवाजीनगर घोले रस्ता क्षेत्रीय कार्यालयात प्रभाग नुसार आलेल्या हरकती

• प्रभाग दहा शिवाजीनगर गावठाण - संगमवाडी एक

• प्रभाग पंधरा गोखलेनगर-पंचवटी दोनशे सोळा

• प्रभाग सोळा फर्ग्युसन कॉलेज- एरंडवणे पाच