सरकारचा मोठा निर्णय! पॅकेट पाहून समजेल तुमचं खाणं किती Healthy

खरेदी केलेले उत्पादन आरोग्यासाठी (Health) किती हानिकारक आहे हे ग्राहकाला कळावे, यासाठी भारतीय अन्न सुरक्षा व मानके प्राधिकरण (FSSAI) सर्व पॅकेज उत्पादनांचे हेल्थ रेटिंग करेल. FSSAIच्या एका वरिष्ठ अधिकाऱ्याने सांगितले की, हेल्थ स्टार रेटिंग (HSR)चे उद्दीष्ट ग्राहकांना निरोगी अन्न खाण्याकडे आणणे हे आहे, जेणेकरून बिघडलेल्या लाइफस्टाइलमुळे भारतीयांना आजारी पडण्यापासून वाचवले जाऊ शकेल.

या मानकांवर रेटिंग निश्चित केले जाणार आहे

FSSAIच्या अधिकाऱ्याने सांगितले की, उत्पादनांमध्ये असलेल्या मीठ, साखर आणि चरबीचे प्रमाण यावर आधारित उत्पादनांचे आरोग्य रेटिंग निश्चित केले जाईल. ही माहिती पॅकेटच्या पहिल्या पानावरच दिली जाईल. 'आयआयएम अहमदाबाद'च्या संशोधन अहवालात पॅकेटच्या पहिल्या पानावर माहिती दिल्यास ग्राहकांवर अधिक परिणाम होईल, असे म्हटल्यानंतर ही तयारी करण्यात आली आहे.

20 हजार लोकांवर हा सर्व्हे करण्यात आला

'FSSAI'चे मुख्य कार्यकारी अधिकारी अरुण सिंघल यांनी सांगितले की, आयआयएम अहमदाबादने देशभरातील सुमारे २० हजार लोकांसह याचे सर्वेक्षण केले आणि समाजाला निरोगी खाण्याकडे कसे वळवता येईल, याचा शोध घेतला. या बदलाच्या माध्यमातून डायबिटीज, बीपी आदी असंसर्गजन्य आजारांना (NCD) आळा बसणार असल्याचे त्यांनी सांगितले.

आता पॅकेटच्या मागे माहिती

उत्पादनांमध्ये असलेल्या पोषक तत्वांची (nutrient) माहिती देण्याची सूचना FSSAIने यापूर्वीच केली आहे, परंतु कंपन्या आता पॅकेटच्या मागील बाजूस देतात. आयआयएम अहमदाबादने (IIM-A) पहिल्या पानावर माहिती दिल्यास त्याचा अधिक परिणाम होईल, असे सुचविले. ब्रिटन, चिली, मेक्सिको, न्यूझीलंड आणि ऑस्ट्रेलियासारख्या देशांमध्ये हा निकष पाळला जातो.