गणेशोत्सव2019 : दोनशे गावांमध्ये ‘एक गाव, एक गणपती’

गणेशोत्सव2019 : गडचिरोली - सर्व विघ्नांचे हरण करणारा विघ्नहर्ता श्रीगणेशाचे आगमन झाले असून जिल्ह्यात दोनशे गावांमध्ये ‘एक गाव, एक गणपती’ संकल्पना साकार होत आहे. याशिवाय जिल्ह्यात ४५० सार्वजनिक ठिकाणी श्रीगणेश विराजमान होत आहेत. जवळपास २ हजार ६०० घरांमध्येही गणराया मुक्‍कामाला आले आहेत.

एकाच गावात अनेक मंडळांचे वेगवेगळे गणपती बसत असल्याने प्रत्येक मंडळाचा वेगळा खर्च होतो. शिवाय गणेशोत्सवाचे सार्वजनिक स्वरूप व ऐक्‍याचा उद्देश साध्य होत नाही. त्यामुळे मागील काही वर्षांपासून ‘एक गाव, एक गणपती’ संकल्पना राबविली जात आहे. ही संकल्पना अनेक गावांमध्ये स्वीकारली जात असून या संकल्पनेचा वापर करणाऱ्या गावांची संख्या निरंतर वाढत आहे. पोलिस विभाग या कार्यात पुढाकार घेते. 

पोलिस विभागाच्या आवाहनाला प्रतिसाद  देत यंदा २०० गावांनी ‘एक गाव, एक गणपती’ संकल्पना राबविण्याचा निर्णय घेतला आहे. गडचिरोली जिल्हा आदिवासीबहुल असला; तरी येथे विविध जाती, धर्मांच्या सणासोबतच गणेशोत्सवही मोठ्या उत्साहात साजरा करण्यात येतो. येथील पोलिस दल नक्षल घटनांबद्दल नेहमी सतर्क असते. मात्र, गणेशोत्सवाच्या काळात सार्वजनिक शांतता व सुव्यवस्था भंग होण्याच्या घटना सहसा घडत नाहीत.

गडचिरोली जिल्हा पोलिस दलाच्या ९ उपविभागांपैकी गडचिरोली  आणि कुरखेडा उपविभागात सर्वाधिक सार्वजनिक गणेशमूर्ती स्थापन झाल्या आहेत. याशिवाय अहेरी, सिरोंचा, धानोरा, एटापल्ली, भामरागड आणि जिमलगट्टा उपविभागातही गणेशोत्सव मोठ्या उत्साहात साजरा होणार आहे. यंदा ‘एक गाव, एक गणपती’ संकल्पनेचा अंगीकार करणाऱ्या  दोनशे गावांमध्ये प्रत्येक गावात एकच सार्वजनिक गणपती राहणार आहे.