वादळाच्या तडाख्यात जपानमध्ये २६ मृत्युमुखी

टोकियो - जपानच्या पूर्व किनाऱ्याला हॅगबिस या चक्रीवादळाने दिलेल्या तडाख्यात मृत्युमुखी पडलेल्यांची संख्या २६ झाली असून, अद्याप किमान १५ जण बेपत्ता आहेत. जपान सरकारने बचावकार्याला सुरवात केली आहे. 

या चक्रीवादळामुळे पडलेल्या जोरदार पावसामुळे देशभरातील १४ नद्यांना पूर आले असून, अनेक ठिकाणी नागरिक अडकून पडले आहेत. या नागरिकांच्या बचावासाठी हेलिकॉप्टर तैनात करण्यात आले आहेत. पुराचे पाणी निवासी भागांमध्ये शिरल्याने अनेक जण घरांच्या गच्चीवर मदतीच्या आशेने जमा झाल्याचे सरकारने सांगितले. अनेक भागात पाण्यामुळे बुलेट ट्रेनही बंद आहेत. पावसामुळे विविध ठिकाणी अपघात होऊन, अथवा पुराच्या पाण्यात वाहून गेल्याने १९ जणांचा मृत्यू झाला आहे. पावसामुळे वीज यंत्रणा कोलमडली असून सुमारे चार लाख घरे अंधारात आहेत.