Earthquake : भूकंपातून तरुणाला 94 तासांनंतर काढलं ढिगाऱ्यातून बाहेर; जीव वाचवण्यासाठी पीत होता स्वत:ची लघवी!

Turkey-Syria Earthquake : लागोपाठ झालेल्या भूकंपाच्या दोन मोठ्या धक्क्यांनंतरही तुर्कीमध्ये भूकंपाचे धक्के बसणं सुरूच आहे. या देशात भूकंपाचे तब्बल 39 धक्के बसले असून आतापर्यंत अनेक लोकांचा मृत्यू झालाय.

तुर्की आणि सीरियामध्ये झालेल्या भीषण भूकंपात आतापर्यंत 24 हजारांहून अधिक लोकांचा मृत्यू झालाय. अनेक दिवस उलटून गेले तरी बचावकार्य सुरूच आहे.

अलीकडंच, तुर्कस्तानच्या दक्षिणेकडील गझियानटेप प्रांतात बचाव पथकानं इमारतीच्या ढिगाऱ्यातून एका तरुणाला जिवंत बाहेर काढलं. भूकंपानंतर 94 तासांनी त्याला बाहेर काढण्यात आलं. यादरम्यान 17 वर्षीय तरुणानं लघवी पिऊन स्वत:ला जिवंत ठेवलं.

स्थानिक मीडियाच्या वृत्तानुसार, अदनान मुहम्मद कोर्कुट याला (Adnan Muhammad Korkut) गुरुवारी उशिरा गझियानटेपच्या सेहितकामिल जिल्ह्यातील एका अपार्टमेंटच्या ढिगाऱ्यातून वाचवण्यात आलं. अदनाननं बचाव पथकाला सांगितलं की, त्यानं जगण्यासाठी स्वतःची लघवी प्यायली आणि लोक येण्याची तो वाट पाहत होता.

या घटनेचा व्हिडिओ व्हायरल झाला असून त्यात त्यानं म्हटलंय, जगण्यासाठी मी स्वतःची लघवी प्यायली. मी जगू शकलो, यासाठी देवाचे खूप आभार मानतो, असं तो म्हणाला. दरम्यान, कोसळलेल्या इमारतींमधून वाचलेल्यांना बाहेर काढलं जात आहे. एका नवजात बाळालाही ढिगाऱ्यातून जिवंत बाहेर काढण्यात आलं आहे.

मदतकार्य जोरात सुरू

तुर्कीमध्ये भूकंपाचे धक्के जाणवत असताना त्या ठिकाणी मोठ्या प्रमाणावर मदतकार्य सुरू झालंय. एपी या वृत्तसंस्थेनं दिलेल्या माहितीनुसार, तुर्कीसह सीरियामध्ये शेकडो इमारती जमीनदोस्त झाल्यामुळं मोठं नुकसान झालंय. या भूकंपाचा फटका सर्वच प्रमुख शहरांना बसल्यामुळं जनजीवनही विस्कळीत झालंय. अजूनही अनेक जण ढिगाऱ्याखाली अडकले असल्याची भीती आहे, त्यामुळं बचाव आणि मदतकार्य मोठ्या प्रमाणावर चालवलं जात आहे.