Indian Medicines : उझबेकिस्तानमध्ये 19 मुलांचा मृत्यू; WHO म्हणतं, भारतात तयार होणारी 'ही' औषधं मुलांना देऊ नका!

Uzbekistan 19 Children Death : उझबेकिस्तानमध्ये 'कफ सिरप' खाल्ल्यानंतर मुलांचा मृत्यू झाल्याच्या वृत्तानंतर नोएडास्थित फार्मा मेरियन बायोटेकवर प्रश्न उपस्थित होत आहेत. आता जागतिक आरोग्य संघटनेनंही (World Health Organization) यासंदर्भात अलर्ट जारी केलाय.

डब्ल्यूएचओनं (WHO) शिफारस केलीये की, नोएडास्थित कंपनी मेरियन बायोटेकनं बनवलेले दोन कफ सिरप मुलांना देऊ नयेत. भारताच्या मेरियन बायोटेकनं (Marion Biotech) बनवलेले कफ सिरप मुलांसाठी वापरले जाऊ नये, असं जागतिक आरोग्य संघटनेनं म्हटलंय.

जागतिक आरोग्य संघटनेनं AMBRONOL सिरप आणि DOK-1 Max सिरप बाबत अलर्टही जारी केलाय. चाचणी दरम्यान, या दोन्ही उत्पादनांमध्ये डायथिलीन ग्लायकोलची अस्वीकार्य पातळी आढळलीये, असं त्यांचं म्हणणं आहे.

डिसेंबर महिन्यात उझबेकिस्तानच्या आरोग्य मंत्रालयानं दावा केला होता की, भारतीय औषध कंपनीनं बनवलेल्या औषधांचं सेवन केल्यामुळं देशातील किमान 18 मुलांनी आपला जीव गमावला आहे. WHO नं म्हटलंय, 'या दोन्ही उत्पादनांना या क्षेत्रातील इतर देशांमध्ये विपणन अधिकृतता असू शकते. ते अनौपचारिक बाजारपेठेद्वारे इतर देश किंवा प्रदेशांमध्ये देखील वितरित केले जाऊ शकतात.' दुसरीकडं, उझबेकिस्तानमध्ये 18 मुलांचा मृत्यू झाल्यानंतर उत्तर प्रदेशच्या अन्न सुरक्षा आणि औषध प्रशासन विभागानं यूपीच्या मेरियन बायोटेक कंपनीचा उत्पादन परवाना रद्द केला आहे.