China : चीन खोदणार दहा हजार मीटर खोल छिद्र

बीजिंग : चीनचे शास्त्रज्ञ जमिनीखाली सुमारे दहा हजार मीटर अर्थात ३२ हजार ८०८ फूट खोल छिद्र पाडत असल्याची माहिती मंगळवारी शिन्हुआ या सरकारी वृत्त संस्थेने दिली. चीनमधील खनिज तेलाने समृद्ध असलेल्या शिंजियांग प्रांतामध्ये हे छिद्र पाडण्याचे काम सुरु करण्यात आले आहे.

चीनच्या अभियांत्रिकी अकादमीचे शास्त्रज्ञ सन जिनशेंग यांनी दिलेल्या माहितीनुसार, जमिनीखालील पाषाणाचे सुमारे दहा थर छेदून हे छिद्र पाडले जाणार आहे. हे काम म्हणजे, स्टीलच्या अत्यंत पातळ तारेवरून ट्रक चालविण्या इतके जिकिरीचे असल्याचा दावा जिनशेंग यांनी केला आहे.

हा प्रयोग यशस्वी झाल्यास सुमारे १४५ दशलक्ष वर्षांपूर्वीच्या क्रेटेशियस थरांपर्यंत हे छिद्र पोहोचणार असून यातून पृथ्वीशी संबंधित अनेक गोष्टींचा उलगडा होणार असल्याचा दावा चीनने केला आहे. त्याचप्रमाणे खनिजे आणि भूगर्भातील हालचालींची माहिती मिळण्यासाठी देखील या प्रयोगाचा उपयोग होणार असल्याचा दावा चीनच्या शास्त्रज्ञांनी केला आहे.

चीनचे अध्यक्ष शी जिनपींज यांनी चीनमधील शास्त्रज्ञांना २०२१मध्ये भूगर्भाचा सखोल अभ्यास करण्यासाठी आवाहन केले होते. त्याचाच एक भाग म्हणून या प्रकल्पाला सुरुवात करण्यात आल्याचे मानले जात आहे.

प्रयोग यशस्वी झाला तर...

रशियाने देखील १९८९ मध्ये अशाच पद्धतीचे जमिनीखाली सुमारे सव्वा बारा हजार मीटर अर्थात ४० हजार २३० फूट छिद्र पाडले होते. चीन जर या प्रयोगात यशस्वी झाला तर हे जगातील दुसऱ्या क्रमांकाचे मोठे छिद्र ठरणार आहे.