कमरेवर हात ठेवून दोन पायांवर पळतो हा सरडा; पाहा मजेशीर व्हिडीओ

सरडा हा सरपटणारा प्राणी कोणत्याही व्यक्तीसाठी नवीन नाही. जगात सरड्याचे अनेक विविध प्रजाती आढळून येतात. यात आपल्याला काही मोजक्याच ठावूक आहेत. विशेष करुन रंग बदलणारा सरडा साऱ्यांनाच ठावूक आहे. चार पायांवर धावणारा सरडा बऱ्याचदा त्याचे रंग बदलतो. मात्र, दोन पायावर चालणारा किंवा पिसारा फुलवणारा सरडा कधी पाहिला किंवा त्याच्याविषयी काही ऐकलं आहे का? सध्या सोशल मीडियावर पिसारा फुलवून आणि दोन पायांवर धावणाऱ्या एका सरड्याचा व्हिडीओ व्हायरल झाला आहे. हा व्हिडीओ @SDG2030 या ट्विटर पेजवर शेअर करण्यात आला आहे.

ट्विटरवर बऱ्याचदा काही भन्नाट व्हिडीओ व्हायरल होत असतात. मात्र, यावेळी शेअर झालेला व्हिडीओ चर्चेचा विषय ठरला आहे.  या व्हिडीओमध्ये एक सरडा चक्क कमरेवर हात ठेवून दोन पायांवर धावत आहे. तसंच त्याच्या मानेपासून पोटापर्यंतच्या भागावर एक पिसारा दिसून येत आहे. इतकंच नाही तर तो एका दगडावर उडी मारून तेथेच उभा राहतो.

दरम्यान, सध्या सोशल मीडियावर हा सरडा चांगलाच चर्चेत आला असून त्याच्याविषयी विविध चर्चा रंगल्या आहेत. इतकंच नाही तर हा व्हिडीओ अनेकांच्या पसंतीत उतरत असल्याचं पाहायला मिळत आहे.  हा व्हिडीओ जवळपास  ३७ हजारांपेक्षा जास्त वेळा पाहिला गेला आहे.

हेही वाचा : सख्खे शेजारी! फ्लोरिडातील जोडप्याने वाटली मोफत बिअर; कारण...

जाणून घ्या या सरड्याविषयी

या सरड्याला फॅन थ्रोटेड लिझर्ड असं म्हटलं जातं. या सरड्याच्या पाच नव्या प्रजाती असून तो भारतातील कोरड्या प्रदेशांमध्ये जास्त आढळून येतात.