बायडेन-पुतीन यांच्यात उद्या ‘व्हिडिओ कॉल’

मॉस्को : युक्रेनच्या सीमेवर असलेल्या रशियाच्या सैन्यामुळे मोठा तणाव निर्माण झाला असल्याच्या पार्श्वभूमीवर अमेरिकेचे अध्यक्ष ज्यो बायडेन आणि रशियाचे अध्यक्ष व्लादीमिर पुतीन हे मंगळवारी (ता. ७) व्हिडिओ कॉलच्या माध्यमातून चर्चा करणार असल्याचे रशियाच्या अधिकाऱ्यांनी सांगितले. सीमेवरील सैन्याच्या हालचालींमुळे युक्रेनवर आक्रमण करण्याचा रशियाचा इरादा असल्याचे चित्र निर्माण झाले आहे.

सीमेवरील सैन्याच्या हालचाली कमी करण्याबाबत किंवा कोणतीही लष्करी कारवाई न करण्याबाबत पुतीन यांच्याकडून आश्‍वासन घेण्याचा प्रयत्न बायडेन करतील, असे व्हाइट हाऊसच्या माध्यम सचिव जेन साकी यांनी सांगितले. युक्रेनच्या सार्वभौमतेला अमेरिकेचा पूर्ण पाठिंबा असल्याचेही यावेळी स्पष्ट केले जाणार असल्याचे साकी यांनी सांगितले. युक्रेनचा समावेश ‘नाटो’ संघटनेत करण्यास रशियाचा विरोध असून आपला उद्देश साध्य करण्यासाठीच ते दबाव निर्माण करत असल्याचे तज्ज्ञांचे मत आहे. बायडेन यांच्याबरोबरील चर्चेत ते याच मुद्द्यावर भर देण्याची शक्यता व्यक्त होत आहे. रशियाच्या या भूमिकेला ‘नाटो’चा विरोध आहे. इतर देशांच्या अथवा संघटनेच्या विस्ताराला हरकत घेण्याचा रशियाला कोणताही अधिकार नाही, असे ‘नाटो’ने सुनावले आहे.

निर्बंधांसाठी पर्याय उपलब्ध

अमेरिकेतील संगणक यंत्रणेवर जुलैमध्ये झालेल्या सायबर हल्ल्यावेळी बायडेन आणि पुतीन यांच्यात संवाद झाला होता. रशियाने युक्रेनवर आक्रमण केल्यास त्यांच्यावर निर्बंध घालण्याचे अनेक पर्याय अमेरिकेकडे उपलब्ध असल्याचा इशारा तज्ज्ञांनी दिला आहे. रशियाच्या वित्त यंत्रणेत अडथळे आणण्यासाठी रशियाच्या अनेक कंपन्यांवर निर्बंध घालता येऊ शकतात, असे तज्ज्ञांचे म्हणणे आहे.