Benjamin Netanyahu Hospitalized : इस्राईलचे पंतप्रधान नेतान्याहू रुग्णालयात दाखल; पेसमेकर बसवण्यासाठी होणार शस्त्रक्रिया

इस्राईलचे पंतप्रधान बेंजामिन नेतान्याहू यांना तातडीने रुग्णालयात दाखल करण्यात आलं आहे. त्यांच्यावर पेसमेकर बसवण्यासाठी शस्त्रक्रिया होणार आहे. आज पहाटे त्यांच्या कार्यालयाने याबाबत माहिती दिली.

अवघ्या काही दिवसांपूर्वीच ते रुग्णालयातून डिस्चार्ज झाले होते. यानंतर आता पुन्हा एकदा त्यांना रुग्णालयात दाखल केलं आहे. "पंतप्रधान नेतान्याहू यांच्यावर आज रात्री शेबा मेडिकल सेंटरमध्ये शस्त्रक्रिया पार पडेल. यात त्यांच्या शरीरात पेसमेकर बसवण्यात येईल." असं पंतप्रधान कार्यालयाने म्हटलं आहे.

"पंतप्रधान हे औषधांच्या प्रभावाखाली असताना, न्याय मंत्री आणि उपपंतप्रधान यारीव लेनिन त्यांच्या जागी प्रभारी असतील", असंही पंतप्रधानांच्या कार्यालयाने स्पष्ट केलं आहे. (Israel PM Hospitalized)

आठवड्यापूर्वीच झाले डिस्चार्ज

एक आठवड्यापूर्वीच नेतान्याहू यांना याच रुग्णालयातून डिस्चार्ज मिळाला होता. वारंवार चक्कर येत असल्याच्या तक्रारीमुळे त्यांना रुग्णालयात दाखल करण्यात आलं होतं.

यावेळी कार्डिओलॉजिकल चाचण्यांचा भाग म्हणून, नेतान्याहू यांच्या हार्ट रेटची निगराणी करण्यासाठी हॉल्टर मॉनिटर वापरण्याचा निर्णय घेण्यात आला होता. यासाठी त्यांच्या शरीरात हे डिव्हाईस इम्प्लांट करण्यात आले होते. शनिवारी रात्री या डिव्हाईसने धोक्याचा इशारा दिला. यानंतर त्यांच्या शरीरात पेसमेकर बसवण्याचा निर्णय घेण्यात आला.