Shinzo Abe Death: भाषणादरम्यान झालेल्या गोळीबारात शिंजो आबे यांचं निधन

जपानचे माजी पंतप्रधान शिंजो आबे यांच्यावर एका भाषणादरम्यान पश्चिम जपानमधल्या नारा शहरामध्ये गोळीबार करण्यात आला आहे. या गोळीबारात त्यांचा मृत्यू झाला आहे. शिंजो आबे यांच्या कार्यकाळात त्यांचे भारताशी जिव्हाळ्याचे संबंध होते. (Shinzo Abe Passed Away)

NHKया जपानी वृत्तसंस्थेने दिलेल्या वृत्तानुसार, त्यांच्या पत्रकाराने या ठिकाणी गोळी झाडल्यासारखा आवाज ऐकला आणि शिंजो आबे (Shinzo Abe) जखमी झाल्याचंही पाहिलं. त्यानंतर त्यांना तात्काळ रुग्णालयात नेण्यात आलं. मात्र उपचारादरम्यान त्यांचा मृत्यू झाला. आज सकाळी जपानमधल्या नारा शहरात ते एका सभेमध्ये भाषण करत होते.

या भाषणादरम्यान त्यांच्यावर पाठीमागून दोन गोळ्या झाडण्यात आल्या. त्यानंतर त्यांना हृदयविकाराचा झटका आला आणि ते खाली कोसळले. त्यांना तात्काळ उपचारासाठी रुग्णालयात दाखल कऱण्यात आलं. मात्र, उपचार सुरू असतानाच त्यांचा मृत्यू झाला आहे. पोलिसांनी या गोळीबाराप्रकरणी एका संशयिताला अटक केली आहे. त्याची सध्या चौकशी सुरू आहे.

या संशयिताने भाषणादरम्यान मागच्या बाजूने गोळी झाडल्याचं सांगण्यात येत आहे. या संशयित हल्लेखोराला ताब्यात घेण्यात आलं असून त्याची बंदूकही जप्त कऱण्यात आली आहे. हा हल्लेखोर ४० वर्षांचा आहे. शिंजो आबे यांचे भारताशी घनिष्ट संबंध आहेत. त्यांनी आपल्या कार्यकाळात चारवेळा भारताला भेट दिली आहे. शिंजो आबे ६७ वर्षांचे असून आक्रमक नेते म्हणून त्यांची ओळख होती.