तत्काळ युक्रेन सोडा; जो बायडेन यांचे अमेरिकन लोकांना आदेश, युद्धाचेही संकेत

अमेरिका आणि रशियातील संघर्ष शिगेला पोहोचल्याचं चित्र आहे. युक्रेनच्या सीमांवर लष्कर तैनात केल्यानंतर दोन्ही महासत्ता माघार घ्यायला तयार नाहीत. अमेरिकेचे अध्यक्ष जो बायडेन यांनी अमेरिकन नागरिकांना युक्रेनमधून ताबडतोब निघून जाण्याचे आवाहन केलं आहे.

अमेरिका आणि रशियन सैन्याने जमिनीवर एकमेकांना गुंतवून ठेवल्यास येणाऱ्या काळात कठोर निर्णय घ्यावे लागतील, असं त्यांनी म्हटलंय. मॉस्कोसोबत संभाव्य संघर्षाबद्दल त्यांनी संकेत दिले आहेत. (Joe Biden warns US citizens to leave Ukraine)

'अमेरिकन नागरिकांनी आता निघून जावं, आणि युक्रेन सोडावं', अशी माहिती बायडेन यांनी एका वृत्तसंस्थेला दिली आहे. आम्ही जगातील सर्वात मोठ्या सैन्यांपैकी एक असलेल्या रशियासोबत व्यवहार करत आहोत. यंदा परिस्थिती खूप वेगळी आहे आणि गोष्टी लवकर वेडी वाकडी वळणं घेऊ शकतात,' असं बायडेन म्हणाले.

या वक्तव्यानंतर दोन्ही राष्ट्रांमधील परिस्थिती चिघळल्याचा अंदाज येतो. येणाऱ्य़ा काळात संघर्ष तीव्र झाल्यास युक्रेनमधील अमेरिकी नागरिकांना धोका निर्माण होऊ शकतो. यामुळे त्यांनी देश सोडून जावं, असं आवाहन करत असल्याचं बायडेन म्हणाले.