दिसताक्षणी बंडखोरांना गोळ्या घालण्याचे कझाकीस्तान सरकारचे आदेश

नूर सुलतान : कझाकीस्तानमध्ये (Kazakhstan) जनआंदोलन तीव्र झाल्यानंतर सरकारही आक्रमक झाले आहे. हिंसाचाराला दहशतवादी आणि बंडखोर कारणीभूत असून अशा लोकांना दिसता क्षणी गोळी घालण्याचे आदेश दिले असल्याचे देशाचे अध्यक्ष कासिम जोरमात तोकायेव्ह यांनी सांगितले. (Global News in Marathi)

तोकायेव्ह यांनी आज दूरचित्रवाणीवरून जनतेशी संवाद साधत बंडखोरांना इशारा दिला. आंदोलकांशी चर्चा करण्यास साफ नकार दिला आहे. ‘खूनी आणि गुंडांबरोबर काय चर्चा करणार?,’ असा सवाल त्यांनी केला. गृह मंत्रालयाने दिलेल्या माहितीनुसार, संघर्षात आतापर्यंत २६ आंदोलकांचा मृत्यू झाला असून १८ पोलिसांनाही जीव गमवावा लागला आहे. पोलिसांनी आतापर्यंत सात हजार जणांना ताब्यात घेतले आहे.

शांती सैन्याची मदत

इंधनाचे दर दुपटीने वाढल्याने संतप्त झालेल्या नागरिकांनी हे आंदोलन सुरु केले आहे. हिंसक बनलेल्या या आंदोलनात आंदोलकांनी सरकारी इमारती आणि अधिकाऱ्यांवर हल्ले सुरु केले आहेत. सरकारने रशियाच्या नेतृत्वाखालील सामूहिक सुरक्षा करार संघटनेकडे लष्करी मदतीची मागणी केली आहे. हे सैन्य तैनात होण्यास सुरुवात झाली आहे. मात्र, हे सैन्य केवळ सरकारी इमारतींचेच संरक्षण करणार असल्याचे कझाकीस्तानच्या अधिकाऱ्यांनी स्पष्ट केले.