Pakistan Rain: पाकिस्तानमध्ये पावसामुळे परिस्थिती गंभीर, आतापर्यंत ८६ जणांचा बळी

Pakistan Rain: भारतात दिल्लीसह उत्तरेत पावसाने हाहाकार माजविला असताना पाकिस्तानमध्येही पावसामुळे परिस्थिती गंभीर बनली आहे. गेल्या २४ तासांत देशभरात सहा जणांचा बळी गेला तर नऊ जण जखमी झाले आहेत.

या हंगामात पावसामुळे बळी गेलेल्यांची संख्या ८६ झाली असून १५१ जण जखमी झाल्याची अधिकृत नोंद करण्यात आली आहे. मृतांमध्ये १६ महिला आणि ३७ मुलांचा समावेश आहे. मुसळधार पावसामुळे ९७ घरांचे नुकसान झाले आहे. पाकिस्तानमधील पंजाबमध्ये सर्वाधिक ५२ नागरिकांचा मृत्यू झाला आहे. (Rain Update)

खैबर पख्तुन्ख्वा प्रांतात २० तर बलुचिस्तानमध्ये सहा जणांचा मृत्यू झाला आहे. पाकिस्तानमध्ये २०२३ मध्ये विनाशकारी पूर येण्याची ७२ टक्के शक्यता असल्याचा अंदाज आपत्कालीन व्यवस्थापनाने एप्रिलमध्ये व्यक्त केला होता.

देशातील स्थितीवर १७ उपग्रह आणि ३६ पूर चेतावणी प्रणालींद्वारे लक्ष ठेवत जात आहे, असे पाकिस्तानच्या हवामान बदल मंत्रालयाने सांगितले. गेल्या वर्षाप्रमाणे यंदाही पुराचा फटका बसला तर पाकिस्तान मोठ्या आर्थिक संकटात सापडेल, असा इशारा तज्ज्ञांनी दिला आहे.