Taliban : तालिबान्यांचा अजून एक प्रताप, गर्भनिरोधक गोळ्यांवर घातली बंदी! कारण वाचून हैराण व्हाल

अफगाणिस्तानवर ताबा मिळवला तेव्हापासून तालिबानी तेथील महिलांवर वेगवेगळे निर्बंध लावत आहेत. तालिबानने देशातील दोन प्रांतात गर्भनिरोधक औषधांच्या विक्रीवर बंदी घातली आहे. सर्व औषध दुकानदारांना इशाराही देण्यात आला असून, हे पाश्चात्य देशांचे  षडयंत्र असल्याचे सांगितले जात आहे. मुस्लिम लोकसंख्येवर नियंत्रण ठेवण्याचे पाश्चात्य देशांचे षडयंत्र आहे. त्यामुळे तालिबानी हा निर्णय घेतल्याचे म्हटले आहे. 

मुस्लिम लोकसंख्या नियंत्रणात ठेवण्यासाठी गर्भनिरोधक गोळ्यांचा वापर होत आहे, असे तालिबाण्यांना वाटते. त्यामुळे त्यांनी घराघरात जाऊन या औषधांचा वापर करू नका म्हणून इशारा दिला आहे. दुकानदारांना देखील गंभीर इशारा दिला आहे. काबूल येथील एका दुकानदाराने या नवीन नियमाबाबत सविस्तर माहिती दिली आहे.

एका वृत्त संस्थेशी बोलताना स्थानिक दुकानदार म्हणाले, ते (तालिबानी) माझ्या दुकानवर दोन वेळा आले होते. त्यांनी मला गर्भनिरोधक औषधी न ठेवण्यासाठी धमकी दिली आहे. हे लोक काबूलमध्ये प्रत्येक दुकान तपासत आहेत. त्यामुळे औषधांचा जुना साठा विकायला देखील भीती वाटते. गेल्या महिनाभरापासून हीच परिस्थिती आहे.

लोकसंख्या नियंत्रणासाठी पाश्चिमात्य संस्कृतीचा प्रसार करायचा नाही. ह्या सर्व अफवा असल्याचे तालिबान्यांनी म्हटले आहे. यापूर्वी देखील तालिबानकडून महिलांवर अनेक प्रकारचे निर्बंध लादले गेले आहेत.