आमच्या देशात कोरोना फिरकलाच नाही

जगभरातील अनेक देशात कोरोनाची स्थिती भयावह झालीय. (Corona crisis) कोरोनाचं थैमान दिसून येतंय. त्याचत मृत्यूची संख्याही वाढत असल्याने चिंता व्यक्त करण्यात येतेय. पण, तुर्कमेनिस्तान (Turkmenistan) या देशानं हा दावा खोडून काढलाय. तुर्कमेनिस्तान म्हणतंय, की गेल्या दोन वर्षात त्यांच्या देशात कोरोनाचा एकही रुग्ण आढळला नाही. त्यामुळे त्यांचा हा 'दावा' कितपत खराय हा येणार काळ ठरवणार आहे. जॉन्स हॉपकिन्स युनिव्हर्सिटी (Johns Hopkins University) आणि वर्ल्ड हेल्थ ऑर्गनायझेशन (WHO) यांनी गोळा केलेल्या आकडेवारीनुसार, 60 लाख लोकसंख्या असलेला तुर्कमेनिस्तान हा अशा पाच देशांपैकी एक आहे, जिथं एकही कोरोनाचा रुग्ण आढळला नाही.

तुर्कमेनिस्तान व्यतिरिक्त इतर तीन देश प्रशांत महासागरातील लहान देश आहेत. तर, चौथा देश उत्तर कोरिया आहे. या देशातून कोणतीही माहिती बाहेर येणं फार मुश्किल आहे. तुर्कमेनिस्तानचे अध्यक्ष गुरबांगुली बर्डीमुखमेदोव (Gurbanguly Berdymukhamedov) 2006 पासून देशावर राज्य करत आहेत. त्यांनी म्हटलंय, की आमच्या देशात आत्तापर्यंत कोरोनाचा एकही रुग्ण आढळला नाही. मात्र, संयुक्त राष्ट्रानं सुरु केलेलं राजकारण थांबवावं, असं त्यांनी स्पष्ट केलंय.

मात्र, तुर्कमेनिस्तानमधील संस्था, पत्रकार आणि कार्यकर्ते सांगतात, देशाला कोरोनाच्या तिसऱ्या लाटेचा सामना करावा लागत आहे, याचे काही पुरावेही आहेत. परंतु रुग्णालयांवर दबाव वाढवण्याचे सरकार काम सुरु आहे. दररोज डझनभर लोक मृत्युमुखी पडत आहेत. राष्ट्रपती आपली प्रतिमा टिकवण्यासाठी व्हायरसच्या धोक्याला कमी लेखत आहेत, असंही काहींचं म्हणणं आहे. तुर्कमेन न्यूजचे रुसलान तुर्कमेन म्हणाले, कोविडमुळे मरण पावलेल्या 60 हून अधिक लोकांची नावे आम्ही गोळा केली आहेत. यात शिक्षक, कलाकार आणि डॉक्टरांचा समावेश आहे. पण, सरकार आपली प्रतिमा टिकवण्यासाठी संयुक्त राष्ट्राला फसवत आहे आणि यात हकनाक नागरिकांचा बळी जातोय.