Twitter : ब्ल्यू टिकसाठी मोजावे लागणार दरमहा आठ डॉलर

न्यूयॉर्क : ट्विटरवरील ब्ल्यू टिकसाठी आता महिन्याला आठ डॉलर म्हणजे अंदाजे ६५० रुपये मोजावे लागणार आहेत. ट्विटरचे नवे मालक एलॉन मस्क यांनी नुकतीच ही घोषणा केली. त्यामुळे वापरकर्त्यांनी तीव्र नाराजी व्यक्त केली. या निर्णयावर टीकेची झोड उठली. त्याला उत्तर देताना मस्क यांनी, ‘कितीही तक्रार करा;आठ डॉलर शुल्क मोजावेच लागेल,’ असे स्पष्ट केले आहे.

मस्क यांनी ट्विटरचा ताबा घेतल्यानंतर ब्ल्यू टिकसाठी वीस डॉलर शुल्क आकारले जाणार असल्याच्या बातम्या येत होत्या. त्यावरून ट्विटरच्या वापरकर्त्यांमध्ये खळबळ माजली होती.

सध्या ब्ल्यू टिक सेवा मोफत असून, अनेक उच्चपदस्थ लोक याचा वापर करतात. ही विशेष सेवा असून निवडक लोकांनाच मिळते. कंपनीने २००९मध्ये ब्ल्यू टिक ही विशेष सेवा आणली होती. खोट्या अकाउंटना आळा घालण्यासाठी कंपनी पुरेसे उपाय करत नाही, असा आरोप झाल्यावर ट्विटरने ही उपाययोजना केली होती.

‘आठ डॉलरमध्ये ब्ल्यू टिक. लोक अधिक सशक्त होणार,’ असे ट्वीट मस्क यांनी मंगळवारी केले. पैसे देणाऱ्या व्यक्तींना रिप्लाय व सर्चमध्ये फायदा होईल. तसेच फसवणुकीचे प्रकार टाळण्यासाठी हे उपाय आहेत, असे मस्क यांनी म्हटले होते.