युक्रेनमध्ये आणखी एका भारतीय विद्यार्थ्याचा मृत्यू, उपचारावेळी गेला जीव

सलग सातव्या दिवशीही युक्रेन आणि रशियामध्ये युद्ध (Ukraine Russia War) सुरूच आहे. युक्रेनमध्ये अडकलेल्या एका भारतीय विद्यार्थ्याचा मंगळवारी मृत्यू झाला होता. त्यानंतर आता दुसऱ्या एका विद्यार्थ्याचा मृत्यू झाल्याची माहिती मिळतेय. विन्नित्सिया शहरातील मेमोरियल मेडिकल युनिव्हर्सिटीमध्ये शिकणारा चंदन जिंदल हा विद्यार्थी आजारी पडला होता. उपचारावेळी त्याचा जीव गेल्याची माहिती आहे. (One More Indian Student Died Ukraine)

चंदन जिंदाल (२२) हा पंजाबमधील रहिवासी असून तो युक्रेनमधील विन्नित्सिया शहरातील मेमोरियल मेडिकल युनिव्हर्सिटीमध्ये शिकत होता. जिंदालला मेंदूत इस्केमिक स्ट्रोक (मेंदूला रक्त पुरवठा कमी होणे) आल्याने त्याला याच शहरातील रुग्णालयात दाखल करण्यात आले होते. आज उपचारादरम्यान त्याचा मृत्यू झाला. त्याचा मृतदेह परत आणण्यासाठी त्याच्या वडिलांनी भारत सरकारला पत्र लिहिले आहे. याबाबत हिंदूस्थान टाईम्सने वृत्त दिले आहे.

मंगळवारी एका विद्यार्थ्याचा मृत्यू -

रशियन सैनिकांनी युक्रेनमधील खारकीव्ह शहरात गोळीबार केला होता. यामध्ये एका भारतीय विद्यार्थ्याचा मंगळवारी मृत्यू झाला आहे. नवीन शेखरप्पा असं या विद्यार्थ्याचं नाव असून तो कर्नाटकातील रहिवासी आहे. त्याचा मृतदेह परत आणण्यासाठी कुटुंबीयांनी सरकारला विनंती केली असून सरकार प्रयत्न करत असल्याची माहिती आहे. त्यानंतर दुसऱ्याच दिवशी या पंजाबी विद्यार्थ्याचा मृत्यू झाला आहे.

रशियानं अचानक युक्रेनवर हल्ला केल्यानं परिस्थिती अनियंत्रित झाली. त्यामुळे २० भारतीय विद्यार्थी युद्धग्रस्त युक्रेनमध्ये अडकून पडले होते. आतापर्यंत १२ हजार भारतीयांनी मायदेशी परत आणल्याची माहिती आहे. अद्यापही ८ हजार भारतीय युक्रेनमध्ये अडकले आहे. विशेष म्हणजे, रशिया-युक्रेनच्या सीमेवर असलेल्या खारकीव्ह शहरात काही विद्यार्थी अडकले आहेत. ते व्हिडिओ शेअर करून मदतीची याचना करत आहेत.