US Air Force मधील हिंदू जवानाला मिळाली टिळा लावण्याची परवानगी

अमेरिकेच्या हवाई दलात (US Air Force) काम करत असलेल्या, भारतीय वंशाच्या व्यक्तीला ड्युटीवर असताना टिळा लावण्याची परवानगी देण्यात आली आहे. वायोमिंगमधील एफई वॉरेन या हवाई दलाच्या बेसवर तैनात असलेल्या अमेरिकी हवाई दलाचे एअरमन दर्शन शाह यांना ड्युटीवर असताना टिळा लावण्याची परवानगी दिली आहे.

एरोस्पेस वैद्यकीय तंत्रज्ञ असलेल्या दर्शन हे दोन वर्षांपूर्वी सेवेत रुजू झाले होते. त्यांची 90 व्या ऑपरेशनल मेडिकल रेडिनेस स्क्वाड्रनपदी नियुक्ती झाली होती. तेव्हापासून ते या मागणीचा पाठपुरावा करत होते.

ऑनलाइन ग्रुप चॅटद्वारे धार्मिक सवलतीची विनंती केल्यानं शाह यांना जगभरातून पाठिंबा मिळाला होता. त्यांना 22 फेब्रुवारी 2022 रोजी त्यांना पहिल्यांदाच गणवेशात असताना टिळा लावण्याची परवानगी देण्यात आली. "टेक्सास, कॅलिफोर्निया, न्यू जर्सी आणि न्यूयॉर्कमधील माझे मित्र मला आणि माझ्या पालकांना सांगतायेत की, हवाई दलात असं काहीतरी घडल्यानं त्यांना खूप आनंद होतोय." असं शाह म्हणाले. "हे काहीतरी नवीन आहे. हे असं काहीतरी आहे जे त्यांनी यापूर्वी कधीही ऐकलं नव्हतं किंवा ते शक्य आहे असंही वाटलं नव्हतं. परंतु ते घडलं." असंही ते यावेळी म्हणाले.