"पाकिस्तानला नेहमीच प्राधान्य देऊ"; चीनचे शाहबाज शरीफ यांना आश्वासन

चीनने गुरुवारी पाकिस्तानचे नवे पंतप्रधान शाहबाज शरीफ यांना सांगितले की ते आपल्या शेजाऱ्यांसोबतच्या राजनैतिक संबंधांमध्ये चीन नेहमीच आपल्या सर्वोत्तम मित्र (पाकिस्तान) ला प्राधान्य देतो. यासोबतच, चीनने 60 अब्ज डॉलरच्या CPEC प्रकल्पाला प्रोत्साहन देण्याच्या वचनबद्धतेचा देखील यावेळी पुनरुच्चार केला.

मीडिया रिपोर्टनुसार शाहबाज यांनी मंगळवारी त्यांच्या कार्यालयात चीनी दूतावासाचे प्रभारी पांग चुन्सू यांची भेट घेतली. यावेळी शरीफ म्हणाले की, त्यांचे सरकार चीनसोबतचे संबंध सुधारण्यास खूप महत्त्व देते आणि कृषी, विज्ञान आणि तंत्रज्ञान, शिक्षण आणि गरिबी निर्मूलन या क्षेत्रात द्विपक्षीय सहकार्य आणखी वाढवण्यास उत्सुक आहे.

तसेच शाहबाज यांनी सांगितले की, त्यांचे सरकार चीन-पाकिस्तान इकॉनॉमिक कॉरिडॉर (CPEC) च्या उभारणीचा परिश्रमपूर्वक पाठपुरावा करेल आणि दोन्ही देशांच्या फायद्यासाठी त्याचा वेगवान विकास करेल.

चीनच्या नेत्यांशी शाहबाज यांच्या भेटीबाबत चीनच्या परराष्ट्र मंत्रालयाचे प्रवक्ते झाओ लिजियान यांनी पत्रकार परिषदेत सांगितले की, पंतप्रधान शाहबाज यांच्या सकारात्मक प्रतिसादाचा आम्ही आदर करतो. “चीन आणि पाकिस्तान हे महत्त्वाचे सामरिक भागीदार आणि चांगले मित्र आहेत. आमच्या शेजाऱ्यांसोबतच्या राजनैतिक संबंधांच्या बाबतीत आम्ही पाकिस्तानला नेहमीच प्राधान्य देऊ आणि त्यांच्या सुधारणेच्या प्रयत्नांना पाठिंबा देऊ.

"आम्ही पाकिस्तानी प्रशासनासोबत काम करणे सुरू ठेवू आणि विविध पातळ्यांवर जवळच्या संपर्कात राहू, द्विपक्षीय संबंधांना नवीन आयाम जोडून आणि CPEC ची उभारणी करू," असे चीनच्या प्रवक्त्याने सांगितले.