‘अल्झायमर डे’; दर ३ सेकंदात एकाला स्मृतीभ्रंश

बाळंतपण, पाळी, हल्लीचा ताणतणाव, स्पर्धा यासारख्या बाबींमुळे महिलांमध्येही ताण वाढत आहे. उतारवयात त्याचे परिणाम दिसू लागतात. स्मृतिभ्रंश हा त्यातील एक आजार आहे. यात अगदी क्षुल्लक गोष्टीदेखील लक्षात राहत नाहीत. पुरुषांच्या तुलनेत महिलांना या स्मृतिभ्रंशाची जोखीम दीडपट अधिक असते.

स्मृतिभंश आजारात तारखा, घटना विसरणे, ठिकाणांचा मागोवा गमावणे, घराचा मार्ग विसरणे, वाचनाची अडचण, मित्रांना न ओळखणे, नातेसंबंध विसरणे, निर्णय घेणाची क्षमता कमी होणे. दैनंदिन दिनचर्येमध्ये अडचण येणे, व्यक्ती छंद, सामाजिक कार्यक्रमातून माघार घेणे, असा व्यक्तिमत्त्वात बदल येतो. गोंधळलेले, संशयास्पद, निराश, भयभीत किंवा चिंताग्रस्त दिसतात.

अल्झायमरवर कोणतेही औषधे उपलब्ध नाहीत. काही औषधांनी लक्षणांवर नियंत्रण मिळवता येते. व्हिटॅमिन बी १२ च्या कमतरतेमुळे, हायपोथायरॉईडीझममुळे स्मृतिभ्रंश झाल्यास तो औषधांद्वारे बरा होऊ शकतो. अल्झायमरचे निदान झाले ते लोक ६५ किंवा त्याहून अधिक वयाचे असतात. निदान होण्याआधी सुमारे २० वर्षे रोगाची प्रक्रिया सुरू होऊ शकते.

जे लोक उच्च कार्बोहायड्रेट आहार घेतात. जंक फूड, साखर, पॅकेजमधील अन्न, कोल्ड ड्रिंक्स, फळांचे रस, सूर्यफूल तेल, राईस ब्रॅण्ड ऑईल, सोयाबीन तेल आणि हायड्रोजनयुक्त वनस्पती तेल स्वयंपाकासाठी वापरतात त्यांना स्मृतिभ्रंशांची शक्यता अधिक असते. आरोग्यदायी मेंदूसाठी शारीरिक, मानसिक व्यायाम महत्त्वाचे आहेत. तंबाखू, धूम्रपान, मद्यपानापासून दूर राहावे.

स्मृतिभंश आजारात पाठीच्या कण्यातील द्रवाचा स्तर कमी होतो. मेंदूत बदल होत असल्याचा भास होतो. साठीतील व्यक्ती या आजाराच्या विळख्यात सापडल्या आहेत. भविष्यात पन्नाशीतील व्यक्ती ‘अल्झायमर’च्या विळख्यात सापडू नये यासाठी या आजाराबाबत जनजागरण करण्याची गरज आहे.