अक्कल दाढ दुखण्याच्या समस्येपासून त्रस्त आहात? मग हे घरघुती उपाय कराच...

नागपूर : आपल्यापैकी बऱ्याच लोकांना वयात आल्यावर अक्कल दाढ येते. पण ही अकाल दाढ एकटी येत नाही तर तुमच्यासाठी दुखणं घेऊन येते. अक्कल दाढ येताना आपला जबडा प्रचंड दुखतो. अनेकदा हे दुखणे सहनशक्तीच्या पलीकडे जाते. पण आता चिंता करू नका. अक्कल दाढेच्या समस्येला दूर करण्यासाठी आम्ही तुम्हाला काही घरघुती उपाय सांगणार आहोत. 

अक्कल दाढ येताना का होतात वेदना ?

आपल्या जबड्यामध्ये चार दाढा असतात. त्यात अक्कल दाढ ही शेवटची दाढ असते. ज्यामुळे ती बऱ्याचदा उशीरा येते म्हणजेच आपण वयात आल्यावर येते. मात्र मोठं झाल्यावर जबड्यामध्ये हिरड्यांमध्ये ही दाढ येण्यासाठी पुरेशी जागा नसते. ज्यामुळे तिला वाढण्यासाठी पुरेशी जागा मिळत नाही. म्हणूनच अक्कलदाढ येताना प्रचंड वेदना होतात.

हे उपाय करा आणि वेदना विसरा -

मिठाचे पाणी 

मीठामुळे नैसर्गिक पद्धतीने जीवजंतू कमी होतात. कधी कधी अक्कल दाढ येताना हिरड्या दुखावल्या जातात.. मीठाच्या पाण्याने गुळण्या केल्यामुळे अक्कल दाढीच्या दुखण्यातून आराम मिळू शकतो. यासाठी दिवसभरात दोन ते तीन वेळा मीठाच्या पाण्याच्या गुळण्या करा. 

बर्फाचा शेक 

बर्फ हा दुखणं थांबवण्यावर एक चांगला उपाय आहे. वेदना होत असेल्या भागावर बर्फ लावल्यामुळे त्या भागात दुखणे कमी होते. यासाठी बर्फाने दाढेचा भाग पंधरा मिनीटे शेकावा. ज्यामुळे तुमचं दुखणं नक्कीच कमी होऊ शकेल.

लवंग 

या भागावर कापसाच्या मदतीने लवंगाचे तेल लावा. तसेच तुम्ही दाढ दुखत असलेल्या भागावर लवंग देखील ठेवू शकता. हळू हळू लवंग दाढेखाली दाबली गेल्यामुळे तुमच्या दाढेच्या वेदना कमी होतील. 

पुदिना 

पुदिन्याचा रस अथवा तेल कापसावर घ्या आणि तुमच्या अक्कल दाढेवर लावा. किंवा पुदिन्याचे तेल संपूर्ण दातांवर चोळा यामुळे तुम्हाला चांगला फायदा होऊ शकतो. 

पेरूची पानं 

अक्कल दाढीचे दुखणे असह्य  झाले असेल तर त्यावर पेरूच्या पानांचा वापर केल्यास आराम मिळेल. यासाठी पेरूची पाने अक्कलदाढेच्या भागावर चावा. पेरूच्या पानांच्या रसामुळे तुमचे अक्कल दाढ दुखणे कमी होऊ शकते. 

हळद 

घरात हळद ही असतेच. त्यामुळे अक्कल दाढ दुखणे सुरू झाल्यावर तुम्ही लगेचच हळद त्यावर लावू शकता.