तब्बल 5 शस्त्रक्रियांनंतरही त्रास कमी होईना; अखेर डॉ. शिंदेंच्या प्रयत्नांना यश

अमळनेर (जि. जळगाव) : व्याधी कोणतीही असो त्यावर केवळ शस्त्रक्रिया करणे महत्त्वाचे नसून ती शस्त्रक्रिया तज्ज्ञ डॉक्टरांकडून विशेष कौशल्य वापरून यशस्वी झाली पाहिजे, तरच तो रुग्ण पिडामुक्त होऊ शकतो, याचा प्रत्यय नुकताच डॉ. अनिल शिंदे यांच्या नर्मदा मेडिकल फाउंडेशनमध्ये हर्नियाची सहाव्यांदा यशस्वी शस्त्रक्रिया झालेल्या रुग्णाला आला आहे. (Latest Marathi News)

या हार्निया झालेल्या ६० वर्षीय रुग्णावर यापूर्वी इतर ठिकाणी पाच वेळा शस्त्रक्रिया होऊनही त्याची पीडा कमी होत नव्हती. यामुळे प्रचंड भीती त्यांच्या मनात निर्माण झाली होती. दिलीप बाळू पाटील (वय ६०, रा. जळगाव) असे या पीडित रुग्णाचे नाव असून, गेल्या काही दिवसांपासून तो हर्नियाच्या आजाराने प्रचंड त्रासला होता. त्यांनी वेळोवेळी डॉक्टरांच्या सल्ल्याने औषधोपचार घेतले. मात्र त्यांच्यावर काहीएक फरक पडत नव्हता. एकाच दुखण्यावर तीन वेगवेगळ्या डॉक्टरांनी त्यांच्यावर पाच वेळेस हार्नियाची शस्त्रक्रिया केली होती, तरीही फरक काही पडला नसल्याने रुग्णाने बरे होण्याची आशाच सोडली होती.

अखेर नातलगांच्या सांगण्यावरून त्यांनी अमळनेर येथील नर्मदा मेडिकल फाउंडेशनमध्ये उपचार घेण्यास सुरवात केली. डॉ. अनिल शिंदे यांनी त्यांची सपूर्ण माहिती जाणून घेऊन घेत पुन्हा शस्त्रक्रियेचा सल्ला दिला. सुमारे पाच तास ही शस्त्रक्रिया चालली. यासाठी भूलतज्ज्ञ डॉ. महेश पाटील व स्टाफचे सहकार्य लाभले. अखेर डॉ. शिंदे यांनी रुग्णास कायमचे पिडामुक्त केल्याने नातलगांनी व रुग्णाने डॉक्टरांचे विशेष आभार व्यक्त केले.