Autistic Pride Day 2024 : ऑटिझम आजार नेमका काय आहे? जाणून घ्या 'ही' लक्षणे

Autistic Pride Day 2024 : जगभरात दरवर्षी १८ जून हा दिवस ‘ऑटिस्टिक प्राईड डे’ म्हणून साजरा केला जातो. ऑटिझम या आजाराविषयी लोकांना जागरूक करणे हा या दिनाचा प्रमुख उद्देश आहे. या आजाराबद्दल लोकांना जागृत करण्यासाठी २००५ मध्ये सर्वात आधी हा दिवस साजरा करण्यास सुरूवात करण्यात आली.

ऑटिझम हा आजार नसून एक प्रकारची स्थिती आहे. या आजाराची लक्षणे लवकर दिसून येत नाही. त्यामुळे, व्यक्तीवर उपचार करण्यास विलंब होतो. जर या आजाराची लक्षणे वेळीच लक्षात आली आणि त्यावर त्वरीत उपचार करण्यास सुरूवात केली की, मग या आजारावर नियंत्रण मिळवणे सहज शक्य आहे. शिवाय, योग्य उपचार केल्यावर या आजारातून व्यक्ती बरा होऊ शकतो.

आज या ऑटिस्टिक प्राईड दिनानिमित्त आपण हा आजार नेमका काय आहे? आणि याची लक्षणे कोणती? ते जाणून घेणार आहोत.

ऑटिझम आजार काय आहे?

ऑटिझम हा एक असा आजार आहे की, ज्यामध्ये मूल सामाजिकरित्या कनेक्ट होऊ शकत नाही, किंवा त्याच्या भावना इतरांसमोर स्पष्टपणे व्यक्त करू शकत नाही. या आजारात व्यक्तीचा स्वभाव चिडचिडा तर काही प्रकरणांमध्ये गोंधळलेला असतो.

अशा परिस्थितीमध्ये मुलाची वागणूक आणि विकास पाहून डॉक्टर हा आजार ओळखतात. कारण, हा आजार ओळखण्यासाठी कोणत्याही प्रकारची वैद्यकीय चाचणी उपलब्ध नाही. ऑटिझम आजाराची लक्षणे साधारणपणे २ वर्षानंतर मुलांमध्ये स्पष्टपणे दिसून येतात. विशेष म्हणजे वाढत्या वयानुसार आणि लक्षणांच्या आधारे हा आजार ओळखला जातो. या आजाराची समस्या सामान्यपणे १० वर्षांपर्यंतच्या मुलांमध्ये आढळून येते.

ऑटिझम आजाराची लक्षणे कोणती?

• जन्मानंतर जवळपास २ वर्षांपर्यंत मूल कोणत्याही प्रकारचा संवाद साधत नाही.

• भाषेच्या विकासात विलंब होणे.

• मुलांच्या ग्रुपसोबत खेळायला न आवडणे.

• एकच गोष्ट पुन्हा पुन्हा सांगणे.

• मानसिक उदासीनता.

• शब्दांचा वापर न करता बडबडणे.

• सतत एकटेच राहणे.

• इतरांसोबत मिसळण्यास नकार देणे.

• बोलण्यात अडथळा येणे.

• इतरांसोबत संवाद साधताना नाराजी दर्शवणे.