Jalgaon Crime News : जनावरे चोरणाऱ्या टोळीकडून 18 गुन्हे उघडकीस

जळगाव : जिल्ह्यात विविध ठिकाणी जनावरे चोरीच्या घटना घडल्यानंतर पोलिस अधीक्षकांच्या सूचनेनुसार स्थानिक गुन्हे शाखेच्या पथकाने जनावरे चोरी करणारी टोळी जेरबंद केली. त्यांच्याकडून तब्बल १८ गुन्हे उघडकीस आले आहेत. त्यातील तिघा संशयितांना ताब्यात घेतले आहे. (18 crimes revealed by animal stealing gang Jalgaon Crime News)

जळगाव जिल्ह्यात गेल्या काही महिन्यांत जनावरे चोरीच्या अनेक घटना घडल्या होत्या. त्याची दखल घेत पोलिस अधीक्षक एम. राजकुमार, अप्पर अधीक्षक चंद्रकांत गवळी, स्थानिक गुन्हे शाखेचे निरीक्षक किसन नजन पाटील यांच्या सूचनेनुसार पथक तपासार्थ पाठविण्यात आले.

अशी मिळाली माहिती

या पथकास गुन्ह्यातील प्रमुख सूत्रधार धरणगाव येथील मोहंमद फयाज मोहंमद अयाज असून, तो अजिंठा चौफुली परिसरात स्कॉर्पियो गाडीसह (एमएच १२, बीव्ही ९४१५) दिसून आल्याची माहिती मिळाली. पोलिस पथकाने तातडीने त्याठिकाणी जात धनराज कार डेकोरसमोरून स्कॉर्पियोसह मोहंमद फयाजला (रा. कसाई वाडा, पाळधी) यास ताब्यात घेतले.

हेही वाचा : संयुक्त नावावरील गृहकर्जातून होईल प्राप्तीकराची बचत...

त्याची चौकशी करून वसीम मोहंमद अस्लम कुरेशी (रा. फरहान हॉस्पिटल, जळगाव), नईम शेख कलीम (रा. मासूमवाडी, जळगाव), जाफर गुलाब नबी (कसाईवाडा, पाळधी), हारुन उर्फ बाली शहा (रा. बारा फत्तर, धुळे), अर्शद (पूर्ण नाव नाही) (धुळे), मनोज ऊर्फ मोन्या विठ्ठल पाटील (सुरेशदादानगर, कुसुंबा, जळगाव) यांच्यासमवेत जनावरे चोरी केल्याची कबुली दिली.

त्याच्या माहितीवरून संशयित वसीम मोहंमद अस्लम कुरेशी व नईम शेख यांना ताब्यात घेतले. त्यांनी जिल्ह्यात जामनेर, भडगाव, अमळनेर, एरंडोल, पारोळा, मुक्ताईनगर, चोपडा, जळगाव, पारोळा आदी तालुक्यांत विविध १८ ठिकाणांहून जनावरे चोरी केल्याची कबुली दिली.

तिघांना अटक

या संशयितांपैकी मो. फयाज, वसीम मो. अस्लम कुरेशी, व नईम शेख कलीम अशा तिघांना अटक करण्यात आली. त्यांना जामनेर पोलिस ठाण्यातील गुन्ह्याप्रकरणी तेथे हजर केले.