जळगाव : जिल्ह्यात कोरोनामुळे आणखी एकाचा बळी

जळगाव : जिल्ह्यात कोरोनाचा(corona update) संसर्ग नियंत्रणात असला तरी मंगळवारी (ता. २१) आणखी एकाचा मृत्यू झाल्याचा अहवाल समोर आल्यामुळे आरोग्य यंत्रणेची चिंता वाढली आहे. शिवाय, जिल्ह्यात आणखी दोघे जण बाधित आढळून आले. जळगाव जिल्ह्यात(jalgaon) जुलैपासून कोरोनाचा संसर्ग नियंत्रणात असल्याचे चित्र आहे.

मृत्यूची संख्याही कमी झाली होती. गेल्या दोन महिन्यांत अगदी क्वचित म्हणजे दोन जणांचा बळी गेला होता. त्यानंतर मंगळवारी प्राप्त अहवालानुसार चाळीसगाव तालुक्यातील ६० वर्षीय महिलेचा मृत्यू झाला. त्यामुळे जिल्ह्यातील बळींचा आकडा २५७९वर पोचला आहे. जिल्ह्यात आणखी दोघे जण बाधित आढळून आले. पैकी जळगाव ग्रामीणमधील एक, तर चोपडा तालुक्यातील एकाचा समावेश आहे. दिवसभरात एक जण कोरोनामुक्त झाला. त्यामुळे सक्रिय रुग्णसंख्या ६ झाली आहे.