Jalgaon News : अंत्योदय कार्डधारकांची दिवाळी साखरेविना ‘कडू’

Jalgaon News : राज्य शासन एकीकडे रेशन कार्डधारकांना ‘आनंदाचा शिधा’ वाटप करून गोरगरिबांची दिवाळी गोड करत आहे. त्याचवेळी दुसरीकडे अंत्योदय कार्डधारकांना गेल्या नोव्हेंबरपासून होणारा प्रतिकार्ड एक किलो साखरेचा पुरवठा बंद केला आहे.

यामुळे जिल्ह्यातील एक लाख ३७ हजार २११ अंत्योदय कार्डधारक ऐन दिवाळीत साखरेपासून वंचित आहेत.( Antyodaya card holders Diwali without anandacha shidha jalgaon news )

जिल्ह्यातील रेशन दुकानांना दर महिन्याच्या पाच तारखेपर्यंत संबंधित कार्डधारक संख्येनुसार गहू, तांदूळ, साखरेचा पुरवठा केला जातो. महिनाअखेर जेवढे धान्य कार्डधारक नेतात, तेवढे सील करून ई-पास मशिनवर थम्ब घेणे बंद केले जाते. जेणेकरून एका महिन्याचे धान्य दुसऱ्या महिन्यात दिले जाऊ नये.

पुढील महिन्यात पाच तारखेनंतर परत त्या महिन्यातील धान्याचा पुरवठा केला जातो. मात्र गेल्या नोव्हेंबरपासून अंत्योदय वर्गातील कार्ड असलेल्या कार्डावर साखरेचा पुरवठा झालेला नाही. अंत्योदय कार्डधारकांना ३५ किलो धान्य व एक किलो साखर मिळते. मात्र ती न मिळाल्याने कार्डधारकांचे साखरेचे गणित बिघडले आहे.

एकीकडे शासनाने दिवाळीपूर्वी ‘आनंदाचा शिधा’ शंभर रुपयांत दिला. त्यात तेल, साखर (एक किलो), रवा, हरभराडाळ, पोहे, मैदा (अर्धा किलो) अशा सहा वस्तू ‘आनंदाचा शिधा’ म्हणून दिले. यामुळे गोरगरिबांना दिलासा मिळाला. मात्र दुसरीकडे नियमित साखर देणे दोन महिन्यांपासून बंद केले आहे. यामुळे कार्डधारक नाराज आहेत.

दोन महिन्यांची साखर मिळेल का?

एका महिन्यातील धान्य दुसऱ्या महिन्यात कार्डधारकांना दिले जात नाही. मग ऑक्टोबरमधील साखर नोव्हेंबरमध्ये कार्डधारकांना मिळेल का? आणि मिळाली तरी दोन्ही महिन्यांची एकदम मिळेल का? अशी विचारणा रेशन कार्डधारक दुकानदारांकडे करीत आहेत.

''साखरेचा पुरवठा राज्य शासनाकडून झालेला नाही. साखरेचा पुरवठा झाला, की संबंधित रेशन दुकानदारांना पुरवठा होईल. त्या साखरेचे कसे वाटप करायचे याबाबत संबंधित तहसीलदार निर्णय घेतील.''- संजय गायकवाड, जिल्हा पुरवठा अधिकारी