एरंडोल तालुक्यात कोरोना बळींची 'सेंचूरी'

एरंडोल : शहरासह ग्रामीण भागात कोरोना रुग्णांच्या संख्येत वाढ होत असून, तालुक्यात कोरोना बळींची संख्या शंभर झाली आहे, तर दुसरीकडे तीन दिवसांत कोरोनावर मात करणाऱ्या रुग्णांच्या संख्येतदेखील वाढ होत असल्यामुळे प्रशासनाला काहीसा दिलासा मिळाला आहे. कोरोनाची साखळी खंडित करण्यासाठी प्रशासनातर्फे विविध उपाययोजना राबविल्या जात आहेत. 

आवर्जून वाचा- कडाक्‍याच्‍या उन्‍हात कूल कूलसाठी कुलर..तरीही वीज बिलातून सुटका​
 

तालुक्यातील कोरोना रुग्णांची संख्या चार हजार ६३३ असून, तीन हजार ७३३ रुग्णांनी कोरोनावर मात केली. तालुक्यात कोरोना बळींची शंभरी पूर्ण झाल्यामुळे प्रशासनासमोरील अडचणी वाढल्या आहेत. मागील तीन दिवसांत कोरोनाचे नवीन १४१ रुग्ण आढळले असून, १७७ रुग्णांनी कोरोनावर मात केली आहे. तालुक्यात ६५६ रुग्ण गृहविलगीकरणात असून, जळगाव येथील शासकीय रुग्णालयात ३३, धुळे येथे एक, जळगाव येथे खासगी रुग्णालयात १९, पाचोरा येथे खासगी रुग्णालयात १०, एरंडोल येथे खासगी रुग्णालयात २०, एरंडोल येथील ग्रामीण रुग्णालयात २३, तर कोविड सेंटर येथे ३७ रुग्णांवर उपचार सुरू आहेत. शहरात ११०, तर ग्रामीण भागात ९३ कंटेन्मेंट झोन जाहीर करण्यात आले आहेत. कोरोनाची साखळी खंडित करून रुग्णसंख्या कमी करण्यासाठी प्रसासकीय पातळीवर विविध उपाययोजना केल्या जात आहेत.

अफवा पसरू नये

प्रांताधिकारी विनय गोसावी यांच्या कार्यालयात तहसीलदार अर्चना खेतमाळीस, पालिकेचे मुख्याधिकारी किरण देशमुख, तालुका वैद्यकीय अधिकारी डॉ. फिरोज शेख, ग्रामीण रुग्णालयाचे वैद्यकीय अधीक्षक डॉ. कैलास पाटील, पोलिस निरीक्षक ज्ञानेश्वर जाधव यांची बैठक झाली. प्रांताधिकारी विनय गोसावी यांनी बैठकीत मार्गदर्शन केले. कोरोना रुग्णांवर ग्रामीण रुग्णालयात करण्यात येणाऱ्या उपचारांबाबत माहिती दिली. रुग्णांवर योग्य ते उपचार करण्यात येत असून, नागरिकांनी खोट्या अफवा पसरवू नयेत, असे आवाहन त्यांनी केले.

आवर्जून वाचा- ‘कोविड’च्या इंजेक्शनचा काळाबाजार करणाऱ्यांवर होणार कारवाई 
 

लक्षणे जाणवल्यास तत्काळ तपासणी करा

ग्रामीण रुग्णालयातील कर्मचारी, नर्स रुग्णांची पूर्ण काळजी घेत असल्याचे त्यांनी सांगितले. दरम्यान, प्रांताधिकारी विनय गोसावी, पालिकेचे मुख्याधिकारी किरण देशमुख व त्यांचे सहकारी शहरात फिरून नागरिकांना घराबाहेर न पडण्याचे आवाहन करून दिलासा देत आहे. कोरोनामुळे मृत झालेल्या व्यक्तींवर रामलीला मैदानावर अंत्यसंस्कार करण्यात येत असून, पालिका कर्मचारी दररोज परिसराची साफसफाई करीत असल्याचे त्यांनी सांगितले. कोरोनाबाबत नागरिकांनी मनात कोणतीही भीती न बाळगता कोणतीही लक्षणे आढळल्यास तपासणी करून घ्यावी, असे आवाहन प्रशासनातर्फे करण्यात आले आहे.  
 

संपादन- भूषण श्रीखंडे