राज्यात गदा अन्‌ धनुष्यबाण आपलाच - देवेंद्र फडणवीस

धुळे : ‘‘राज्यात गदा चालविल्याने सत्तापरिवर्तन घडले. आता गदा चालविण्याची गरज नाही. कारण आता हनुमान चालिसा म्हणण्यावर कुठलीही बंदी नाही. त्यामुळे आता गदा पूजेसाठी वापरावी. शिवाय, धनुष्यबाणही आपलाच आहे. मुख्यमंत्री एकनाथ शिंदे यांना धनुष्यबाणासह स्वीकारले आहे,’’ अशी टीका उपमुख्यमंत्री देवेंद्र फडणवीस यांनी शिवसेनेसह महाविकास आघाडीच्या नेत्यांवर केली.

दोंडाईचा (ता. शिंदखेडा) येथील दादासाहेब रावल उद्योग समूहाच्या सुवर्ण महोत्सवानिमित्त शनिवारी झालेल्या कार्यक्रमात उपमुख्यमंत्री फडणवीस यांचे कार्यकर्त्यांनी चांदीची गदा आणि धनुष्यबाण देत स्वागत केले. त्यानंतर उपमुख्यमंत्री म्हणाले, की धनुष्यबाण नेमका कुणाचा? हा निर्णय निवडणूक आयोग घेणार आहे. सद्यःस्थितीत मुख्यमंत्री शिंदे यांच्यासोबत असलेले लोकप्रतिनिधी, पदाधिकारी व कार्यकर्त्यांचे संख्याबळ पाहता धनुष्यबाण शिंदे यांच्याकडेच राहील.

राज्यपालांच्या वक्तव्याशी असहमत

राज्यपाल भगतसिंह कोश्यारी यांनी केलेल्या वक्तव्याबाबत फडणवीस म्हणाले, ‘‘राज्यपालांनी केलेल्या वक्तव्याशी सहमत नाही. राज्याच्या जडणघडणीसह विकासाच्या वाटचालीत मराठी माणसाचेही मोठे योगदान आहे. त्यामुळे जगभरात मराठीचे नाव पोहोचले आहे. राज्याच्या विकासात इतरांचाही सहभाग आहे. म्हणून मराठी माणसाचे महत्त्व कमी होत नाही. एखाद्या कार्यक्रमात अतिशयोक्तीच्या शब्दांच्या वापरातून भाषण करणे गरजेचे असते. राज्यपालांनी बहुधा त्या हेतूने वक्तव्य केले असावे. कुणालाही दुखावण्याचा त्यांचा हेतू नसावा, असे वाटते. राज्यपालांच्या मनात मराठी माणूस व राज्याबद्दल आकस नाही.’’