पंचायत समितीत शुकशुकाट; वेळ संपण्यापूर्वीच निघून जातात कर्मचारी

रावेर (जि. जळगाव) : येथील पंचायत समितीतील विविध कार्यालयात सायंकाळी पावणे सहाच्या सुमारास शुकशुकाट दिसून आला. रोजगार हमी योजना, शिक्षण, पाणीटंचाई, स्वच्छ भारत मिशन आणि पशु विकास अधिकारी यांच्या कार्यालयाला तर कुलूप लावलेले आढळून आले.

येथील पंचायत समितीतील पशुसंवर्धन विभागात दोन अधिकारी होते. तर कृषी, समाजकल्याण विभाग उघडा असून पंखे आणि दिवे सुरू असताना एकही कर्मचारी किंवा अधिकारी कार्यालयात उपस्थित नव्हता. बालविकास प्रकल्प अधिकारी कार्यालयात दोन महिला व पुरुष कर्मचारी उपस्थित होता. तालुका वैद्यकीय अधिकाऱ्यांच्या कार्यालयाला देखील कुलूप लावलेले होते. प्रशासन विभागही अर्धा रिकामा झालेला होता. रेल्वे गाडीच्या वेळेनुसार येथील कर्मचारी कार्यालयात उपस्थिती देत असल्याचे निदर्शनास येत आहे. येथील गटविकास अधिकारी दीपाली कोतवाल यांच्याकडे रावेर व मुक्ताईनगर अशा दोन्ही ठिकाणचा पदभार असल्याने त्यांची पाठ वळताच अधिकारी आणि कर्मचारी दांडी मारून विविध कारणे सांगून कार्यालयातून निघून जातात. याबाबत गटविकास अधिकाऱ्यांनी याची दखल घ्यावी अशी अपेक्षा व्यक्त होत आहे. पाच दिवसांचा आठवडा झाल्यापासून सकाळी साडेदहा ते सायंकाळी साडेसहापर्यंत कार्यालयाची वेळ असताना अप-डाऊन करणारे अधिकारी आणि कर्मचारी वेळेआधीच आपल्या घरी निघून जात असल्याचे सध्या तरी दिसून येत आहे.