Jalgaon: पोटासाठी पाठीला फटके अन् चिमुरड्यांचे भविष्य धुसर; पोतराजांची कुटुंबे पश्चिम महाराष्ट्रातून खानदेशात

Jalgaon News : टिचभर पोटासाठी थंडी, पाऊस, उन्हातान्हाची पर्वा न करता पाठीला फटके मारत उपजीविका करणारे पोतराज भटकंती करत पश्चिम महाराष्ट्रातून खानदेशात आले आहेत. मात्र भटकंतीमुळे त्यांच्या चिमुकल्यांच्या शिक्षणात खंड पडत असल्याने त्यांचे भविष्य धूसर होत आहे. (families of Potrajas came from western Maharashtra to Khandesh jalgaon news)

पोतराज ही एक लोककला असून, शासनाने अशा लोककला जोपासण्यासाठी कलावंतांना स्थानिक परिसरातच हक्काचा रोजगार उपलब्ध करून देणे महत्त्वाचे आहे. परंतु पोटाची खळगी भरण्यासाठी पश्चिम महाराष्ट्रातील सातारा -सांगली भागातून सुमारे १० कुटुंबं सध्या भटकंती करत खानदेशातील पहूर - शेंदुर्णी भागातील यात्रेनिमित्त आलेली आहेत.

पोतराज अंबाबाई देवीचे भक्त असून, देवीचे जागरण करत ते आपल्या पोटासाठी पाठीला चाबकाचे फटके मारतात. ढोलक वाजवत.

त्या आवाजाचा तालावर स्वतःचे दुःख विसरून प्रेक्षकांच्या मनोरंजनासाठी ते दारोदार हिंडून भिक्षा मागतात. मिळालेल्या दोन पैशातून स्वतःची उपजीविका भागवत गावोगाव भटकंती करतात.

रविवारी (ता. ३) पहूर येथे आठवडे बाजारात सांगलीहून आलेले पोतराजाचे कुटुंब चिमुकलीसह तीचा भाऊ चाबकाचे फटके मारून आपल्या कुटुंबाला सहाय्य करत होता. बाजारातील लोकांनी त्यांना दोन पैसे दिलेही, मात्र या चिमुकल्यांच्या शिक्षणात खंड पडल्याने त्यांचे भविष्य धुसर होत असल्याबद्दल शिक्षणप्रेमींनी चिंता व्यक्त केली.