Jalgaon Crime News: मनोज जरांगे पाटीलांच्या सभांमध्ये पाकीट मारणाऱ्या टोळीला अटक

Jalgaon Crime News : मराठा आरक्षणासाठी मनोज जरांगे-पाटील यांच्या सभा सुरू आहेत. सभांमधून पाकीट-मोबाईलची चोरी मालेगावची टोळी करत असल्याचे पोलिसांच्या निदर्शनास आले. जळगावच्या स्थानिक गुन्हे शाखेने पाच संशयितांना अटक केली. त्यात अबू-बकर ऊर्फ कबुतर (वय ३५) या टोळी प्रमुखासह त्याच्या चार साथीदारांचा समावेश आहे.

मौजे कुऱ्हा पानाचे (ता. भुसावळ) गावच्या बसथांबा चौकात श्री. जरांगे-पाटील यांचा सत्कार सोमवारी (ता. ४) करण्यात आला. (gang of thief in manoj jarange patil sabha arrested jalgaon crime news)

दुपारी साडेबाराच्या सुमारास राजू रुपचंद चौधरी यांच्या खिशातील पाकीट चोरीला गेले. साडेपंधरा हजार रुपयांची रोकड पाच तरुणांनी बळजबरीने काढून घेत त्यांना मारहाण केली आणि धमकी देत पिटाळून लावले.

त्या अनोळखी पाच जणांनी सत्कारावेळी दुसऱ्या एकाच्या खिशातून ६६ हजार रुपयांची चोरी केली. राजू चौधरी यांच्या तक्रारीवरून भुसावळ तालुका पोलिसांत गुन्हा दाखल करण्यात आला. गर्दीत पाकीट, मोबाईल चोरीसह काहींना मारहाण करत लूटमार केल्याची कबुली अटकेतील संशयितांनी पोलिस तपासात दिली आहे.

कार्यकर्त्यांच्या वेशात चोरटे

श्री. जरांगे-पाटील यांच्या सभा-मेळाव्यांसाठी मोठी गर्दी होते. मालेगावच्या कबुतर टोळीने अशा ठिकाणी चोऱ्यांचा सपाटा लावला होता. पांढरा शर्ट आणि जीन पँट अशा वेशभूषेत कार्यकर्त्यांचा आव आणला जात होता.

वरिष्ठ पोलिस निरीक्षक किशन नजन पाटील यांच्या पथकाने पोलिसी खाक्या दाखवताच अबू-बकरने आपल्या चार साथीदारांसह मुक्ताईनगर ते पारोळादरम्यान प्रत्येक गाव, तालुक्यात पाकीटमारी केल्याचे सांगितले. जिल्ह्यासह इतर जिल्ह्यात गुन्हे केल्याची माहिती गुन्हे शाखेकडे प्राप्त झाली आहे. इतर जिल्‍ह्यातील पोलिसांशी संपर्क करून माहिती घेतली जात असल्याचे जिल्‍हा पोलिस अधीक्षक एम.राजकुमार यांनी सांगितले.