Cleanliness Drive : महापालिकेतर्फे उद्या गोलाणी संकुल स्वच्छता मोहीम; वॉटरग्रेसच्या कर्मचाऱ्यांकडून सफाई करणार

Cleanliness Drive : महापालिकेतर्फे रविवारी (ता. २४) गोलाणी व्यापारी संकुल स्वच्छता मोहीम राबविण्यात येणार आहे. सफाई मक्तेदार वॉटरग्रेस कंपनीच्या कर्मचाऱ्याकडून संपूर्ण परिसर स्वच्छ करून घेण्यात येणार असल्याचे आरोग्याधिकारी उदय पाटील यांनी एका पत्रकाद्वारे जाहीर केले आहे. (Golani Complex Cleanliness Campaign tomorrow by Municipal Corporation jalgaon news)

याबाबत दिलेल्या प्रसिद्धिपत्रकात त्यांनी म्हटले आहे, की गोलाणी संकुल परिसरातील वॉटरग्रेस कामगारांकडून स्वच्छता मोहीम राबविण्यात येणार आहे. मुख्य स्वच्छता निरीक्षक यांनी आपल्या आजूबाजूच्या परिसराची स्वच्छता करून घ्यावी, असे आदेशही देण्यात आले आहेत.

संकुलातीच विंगनिहाय कर्मचारी नियुक्त

महापालिकेचे आरोग्याधिकारी उदय पाटील यांनी गोलाणी संकुलाच्या एकूण असलेल्या चार विंगनिहाय मुख्य स्वच्छता निरीक्षक, मुकादम व कर्मचारी यांची जबाबदारी निश्‍चित केलेली आहे.

सकाळ सातपासून स्वच्छता मोहीम सुरू होणार आहे.

स्वच्छतेचा मोठा ड्राईव्ह

जिल्हाधिकारी रामराजे निबांळकर यांच्याकडे महापालिकेचा अधिभार असताना त्यांनी गोलाणी संकुल स्वच्छतेची मोहीम राबविली होती. त्या वेळी संकुलातून मोठ्या प्रकारे कचरा काढण्यात आला होता. त्याच पद्धतीने स्वच्छतेचा मोठा ड्राईव्ह घेण्यात येणार आहे. यास सफाई कर्मचारी, तसेच कचरा वाहणारे ट्रॅक्टर असा मोठा ताफा सहभागी होणार आहे.