Hanuman Jayanti 2023 : एकमुखाने बोला.. बोला जय जय हनुमान..! दर्शन पूजन, भंडाऱ्याने जन्मोत्सव साजरा

जळगाव : शक्ती आणि बुद्धीचे प्रतीक, समस्त भारतवासीयांचे दैवत असलेल्या हनुमानाचा जन्मोत्सव गुरुवारी (ता. ६) भक्तांनी मोठ्या उत्साहात साजरा केला. पहाटेपासून मारुती मंदिरांवर अभिषेक, पूजन आदी कार्यक्रम झाले. भक्तांच्या रांगा आणि भंडाऱ्यांनी हा उत्सव साजरा झाला. (hanuman jayanti 2023 celebrated with great enthusiasm jalgaon news)

हनुमान जयंतीनिमित्त बुधवार (ता. ५)पासूनच मंदिरे सजली होती. जळगाव शहरात जिल्हा परिषदेसमोरील पत्र्या हनुमान, गोलाणी संकुलाजवळील दक्षिणमुखी मारुती, सिंधी कॉलनी मार्गावरील पंचमुखी हनुमान, मेहरूणमधील मारुती मंदिर यांसह विविध भागांतील मंदिरांमध्ये गुरुवारी दिवसभर हनुमान जयंतीनिमित्त विविध कार्यक्रम झाले. सकाळी सहापासून धार्मिक विधी व नंतर जन्मोत्सव झाला.

हेही वाचा : जीएसटीसाठी नोंदणी केलीच नाही तर??

महाप्रसादाच्या पंगती

सकाळपासून भक्तांनी हनुमंताच्या दर्शनासाठी रांगा लावल्या होत्या. मारुतीला रुईचा हार, शेंदूर, तेल चढविण्यात आले. मंदिरांमध्ये नारळही वाढविण्यात आले. सकाळी अकरापासून विविध ठिकाणच्या मंदिरांसमोर सभा मंडपात, मोकळ्या जागेत महाप्रसादाच्या पंगती सुरू झाल्या. हजारो भक्तांनी दर्शन, महाप्रसादाचा लाभ घेतला. दिवसभर विविध भजनेही झाली. ‘अंजनीच्या सूता तुला रामाचे वरदान... एकमुखाने बोला, बोला जय जय हनुमान...’, अशा भक्तिगीतांनी मंदिर परिसरातील वातवरण चैतन्यपूर्ण बनले होते.