Husband Wife Fight : कोर्टात खटला चालु अन् पती पत्नीत जुंपली फ्रीस्टाईल; जाणून घ्या नेमक काय घडलं

जळगाव : शहरातीलच माहेर व सासर असलेल्या विवाहितेने पतीविरोधात कौटुंबिक वादातून विभक्त होत खावटीसाठी न्यायालयात दावा दाखल केला आहे. जिल्हा न्यायालयात सुनावणी सुरू असताना, पती व पत्नी यांच्यासह नातेवाइकांमध्ये न्यायालयाच्या आवारातच तुफान हाणामारी झाली. जखमी पतीच्या तक्रारीवरून शहर पोलिसांत गुन्हा दाखल झाला आहे.

शहरातील शनिपेठेतील विवाहितेने कौटुंबिक वादातून फातेमानगरातील पतीविरुद्ध जिल्हा न्यायालयात खावटीसाठी दावा दाखल केला आहे. गेल्या सहा वर्षांपासून पती न्यायालयात हजर राहत नव्हता. बुधवारी (ता. १६) नवरोबा दुपारी जळगाव जिल्हा न्यायालयात अवतरला. पती दिसताच संतप्त पत्नीने त्याला पकडून जाब विचारल्याने वादाला सुरवात झाली व दोन्ही कुटुंबांत तुफान हाणामारी झाली. या वेळी उपस्थित पोलिस कर्मचाऱ्यांनी धाव घेतली. हाणामारीत पती गंभीर जखमी झाला असून, त्याला शासकीय वैद्यकीय महाविद्यालयात दाखल केले आहे. जखमीच्या जबाबावरून शहर पोलिसांत गुन्ह्याची नोंद झाली आहे.